نوێنەری حکومەتی هەرێم پێشوازی لە پارێزگاری سلێمانی دەکات

لەندەن، شانشینی یەکگرتوو، www.uk.gov.krd. کاروان جمال تاهیر نوێنەری حکومەتی هەرێمی کوردستان لە بەریتانیا پێشوازی لە دکتۆر هەڤاڵ ئەبوبەکر پارێزگاری سلێمانی کرد.

لە دیدارەکەدا گفتوگۆیەکی تێر و تەسەل لەسەر دۆخی هەنووکەیی ناوچەی رۆژهەڵاتی ناوەراست، بە تایبەتیش رووداوەکانی رۆژئاوای کوردستان و پێشوەچوونە خێراکان لە ناوچەکە و مه‌تریسی و کاریگەرییان لەسەر ئەمن و ئاسایش و سەقامگیری ناوخۆیی و هه‌رێمی و رۆژهەڵاتی ناوەراست کرا.

هەردوولا جەختیان لەسەر پێویستیی یەکبوون و یەکڕیزیی نیشتمانیی کوردستان کردەوە بۆ رووبەرووبوونەوەی هەرەشەکان و تیشکیان خستە سەر رۆڵی گرینگی رەوەندی کوردستانی بۆ فشار دروستکردن لەسەر داڕێژه‌ران و خاوه‌ن بڕیار،  بەمەبەستی پشتگیریکردن لە کورد و دۆزە رەواکەی.

هەر لە دیدارەکەدا، پارێزگاری سلێمانی ئەلبومی شاکارەکانی هونەرمەندی گەورەی کورد لالە عەبدەی پێشکەش بە نوێنەری حکومەتی هەرێمی کوردستان کرد.

نووسینگەی نوێنەرایەتی
٢١ی کانونی دووەمی ٢٠١٦