نوێنەری حکومەتی هەرێم سه‌ردانی باڵیۆزخانەی کۆماری عیراقی فیدراڵ دەکات

باڵیۆزخانەی عیراقی فیدراڵ، لەندەن، www.uk.gov.krd. دکتۆر احمد الجبوری وەزیری مفەوەز و کاربەرێکەری کاتی باڵیۆزخانەی کۆماری عیراقی فیدراڵ لە شانشینی یەکگرتوو پێشوازیکرد لە کاروان جمال تاهیر نوێنەری حکومەتی هەرێمی کوردستان لە بەریتانیا.

لە دیدارەکەدا گفتوگۆکرا دەربارەی پەیوەندی و هەماهەنگیەکانی نێوان هەردوولا و ئاڵوگۆڕی بیروڕا کرا تایبه‌ت به‌ بۆچوونی باشترکردنی پەیوەندی دامه‌زراوه‌یی و بەرزکردنەوە و بەهێزکردنی ئاستی هەماهەنگی نێوان باڵیۆزخانە و نوێنەرایەتی لە داهاتوودا.

هەر لە دیدارەکەدا گفتوگۆ دەربارەی دۆخی گشتی هەرێمی کوردستان و عێراق و دیاسپۆڕای کوردستانیان لە شانشینی یەکگرتوو کرا، وە جەخت لەسەر خزمەتکرن و راییکردنی پێداویستیەکانیان کرایەوە لە رێگای خزمەتگوزراییە کونسوڵگەرییەکانی باڵیۆزخانە و نوێنەرایەتی حکومەتی هەرێم.

هەردوولا هاوڕابوون لەسەر هەماهەنگی و ووتوێژی بەردەوام و یەکخستنی هەڵویستەکان کە له‌ به‌رژه‌وه‌ندی گشتی وڵات و بەهێزکردنی پێگەی بێت لە شانشینی یەکگرتوو.

باڵیۆزخانەی کۆماری عیراقی فیدراڵ
٨ی کانونی دووەمی ٢٠٢٦