نوێنەرایەتی حکومەتی هەرێمی کوردستان لە بەریتانیا، بەشداری لە بۆنە پێشوازی گه‌شتیاری کەتەلۆنیایی کرد

شانشینی یەکگرتوو، لەندەن، www.uk.gov.krd. هاورێ یوسف بەرێوەبەری بەشی بازرگانی و وەبەرهێنان بە نوێنەرایەتی، نوێنه‌ری حکومەتی هەرێمی کوردستان لە بەریتانیا بەشداریکرد لە بۆنە پێشوازی گه‌شتیاری خواردنی کەتەلۆنیایی لە ( شانگریلا، شارد ).  ئەم بۆنە پێشوازییە لەلایەن حکومەتی کەتەلۆنیا و دەستەی گەشتیاری کەتەلۆنیا لە بەریتانیا و ئێرلەندا ڕێکخرا بوو، مەبەست لێی پیشاندانی ئەزموون و ڕووناکی خستنە سەر کولتوور و خۆراکی ناوچەکە و پێشخستنی دیپلۆماسیه‌تی کولتووری، گەشتیاری، و دەرفەتەکانی وەبەرهێنان. بۆنەکە بە بەشداری نوێنەرانی حکومەتی ووڵاتان و  بازرگانان و  کۆمەڵگەی دیپلۆماسی و میدیاکاران بەرێوەچوو .

لە بۆنە پێشوازییەکەدا، جاوم بارۆ، وەزیری بازرگانی و توانای کێبڕکێی حکومەتی کەتەلۆنیا ووتارێکی پێشکەشکرد و ئاماژەی بەوە دا کە کەتەلۆنیا هەرێمێکی ستراتیجی و لەبارە بۆ وەبەرهێنان لە بوارو و کەرتە جیاجیاکان، لە نێویشینادا کەرتی گەشتیاری. دواتر، ئامادەبووان چێژیان لە ئێوارەخوانێک وەرگرت کە لەلایەن شێفی بەناوبانگی کەتەلۆنی و خاوەن چوار ئەستێرەی میشێلین، پاکۆ پێرێز، ئامادەکرابوو کە تام  و دەوڵەمەندی خواردنی کەتەلۆنی پیشان دەدا.

بەرێوەبەری بەشی بازرگانی و وەبەرهێنان ، سڵاو و پێزانینی کاروان جەمال تاهیر، نوێنەری حکومەتی هەرێمی کوردستان لە بەریتانیا گەیاند و پێزانینی بۆ هەوڵەکانی کەتەلۆنیا دەربڕی لە پێشخستنی کولتوری ناوچەیی و بەشداریکردنی نێودەوڵەتی. هەروەها تیشکی خستە سەر پەرەسەندنی تواناکانی هەرێمی کوردستان لە بواری گەشتیاری، ئاڵوگۆڕی کولتووری، و هەماهەنگی بازرگانی.

هاوکات، نوێنەرایەتی حکومەتی هەرێمی کوردستان لە بەریتانیا بەردەوامە لە پەیوەندی چالاک و هاوبەشکارانە لەگەڵ حکومەتی هەرێمەکان و، دامەزراوەکان و تۆڕە بازرگانییەکان، بۆ پێشخستنی تێگەیشتنی کولتووری و فراوانکردنی هاوبەشی بازرگانی و وەبەرهێنان لەگەڵ هەرێمی کوردستان.