نوێنەری حکومەتی هەرێمی کوردستان بەشداری لە کۆنفرانسی کۆتایی PeaceRep عێراق دەکات لە زانکۆی LSE

 لەندەن، شانشینی یەکگرتوو، www.uk.gov.krd. کاروان جەمال تاهیر، نوێنەری حکومەتی هەرێمی کوردستان لە بەریتانیا، بەشداریی لە کۆنفرانسی کۆتایی PeaceRep عێراق کرد، بەناونیشانی "دوبارە داڕشتنەوەی عێراق: دەسەڵات، سیاسەت و ڕێگاکانی گشتگیری"، کە لەلایەن PeaceRep عێراقەوە بە هاوبەشی لەگەڵ سەنتەری LSE ڕۆژهەڵاتی ناوەڕاست لە سکوڵی ئابووری و زانستی سیاسی لەندەن (LSE) ڕێکخرابوو. کۆنفرانسەکەدا داڕێژەرانی سیاسەت و دیپلۆماتکاران و توێژه‌رانی کۆکردەوە بۆ لێکۆڵینەوە لە ڕێڕەوی سیاسی عێراق و گەڕان بەدوای ڕێگاکانی بەرەو ئاشتی گشتگیر و بەردەوام.

لە کۆنفرانسەکە گفتوگۆ لەسەر پرۆسه‌ی سیاسی و ئاسته‌نگییه‌کان لە دوای ساڵی ٢٠٠٣ کرا و تیشک خرایه‌ سەر چاکسازی لە حوکمڕانی و فشارەکان لەسەر سیستەمە گرینگەکانی وەک پەروەردە و بەڕێوەبردنی سامانە سروشتییەکان و ڕۆڵی عێراق لە چوارچێوەی ئەو گۆڕانکارییە گرینگ وچارەنووسازانەی لە ناوچەکادا ڕوو دەدەن. هاوکات گرنگیەکی تایبەت بە پڕکردنەوەی بۆشایی نێوان توێژینەوە و داڕشتنی سیاسەت درا بۆ پشتگیریکردن لە بونیاتنانی ئاشتی گشتگیر و خۆڕاگری دامەزراوەیی درێژخایەن.

لە میانەی بەشداریکردنی لە پانێڵی کۆتاییدا، کاروان جەمال تاهیر تیشکی خستە سەر ڕۆڵی توێژینه‌وه‌ و دامەزراوە‌کانی توێژینەوە لە بنیاتنانی ئاشتیدا. جەختیشی لەوە کردەوە کە بۆ ئەوەی توێژینەوەکان کاریگەرییەکی ماناداریان لەسەر پرۆسەی ئاشتی هەبێت و به‌هه‌ند وه‌ربگیرێت له‌لایه‌ن بڕیارده‌ران، پێویستە دامەزراوەکان سەربەخۆ و بێلایەن و شەفاف توێژینەوەکانی خۆیان ئەنجام بدەن، وە نوێنه‌رایه‌تی و لۆبی کردنی تێڕوانین و ئایدۆلۆژیای سیاسی نه‌بن.

لە کۆتایی دا کۆنفرانسەکە جەختکرایه‌وە لەسەر پەرەپێدانی پردی په‌یوه‌ندی ناوه‌نده‌كانی توێژینەوە و پۆلسی به‌ ئامانجی به‌شداری کارا له‌بونیادنانی ئاشتی و سه‌قامگیری.