نوێنەری حکومەتی هەرێم لەگەڵ ژمارەیەك لە کاربەدەستانی حکومەتی سکۆتلەندا کۆبۆوە

شانشینی یەکگرتوو، St Andrews House، www.uk.gov.krd. لە درێژەی سەردانەکەیدا بۆ هەرێمی سکۆتلەندا، کاروان جمال تاهیر نوێنەری حکومەتی هەرێمی کوردستان لەگەڵ خاتوو شۆنا ریاچ بەڕێوەبەری کاروباری دەرەوە و جۆرج بێرگێس بەڕێوەبەری فەرمانگەی کشتوکاڵ لە حکومەتی سکۆتلەندا کۆبۆوە.

لە دیدارەکەدا نوێنه‌ری حکومه‌تی هه‌رێم ڕایگه‌یاند کەوا حکومەتی هەرێمی کوردستان خواستی بنیادنانی پەیوەندی بەهێزی هەیە لەگەڵ حکومەتی سکۆتلەندا و ئاستی په‌یوه‌ندی دوولایه‌نه‌ په‌ره‌پێبده‌ن لە بوارە جیاکانی ئابووری و که‌لتووری و په‌ره‌پێدان، لەوانەش ووزە‌‌ی نوێبۆوه‌، ژێرخان و تەکنەلۆژیای کشتوکاڵی و پیشەسازی و گەشتوگوزاری و خوێندنی باڵا و ئاڵوگۆڕی که‌لتووری. هاوکات تیشکی خسته‌ سه‌ر  سەقامگیری بواری ئەمن و ئاسایش لە هەرێم کە ژینگه‌یه‌کی له‌بار و سه‌رنج ڕاکێشی بۆ وه‌به‌رهێنانی بیانی لە هەرێمی کوردستان خولقاندووه‌. 

له‌و سۆنگۆیەشەوە نوێنەری حکومەتی هەرێمی کوردستان پێشنیازی کرد کۆربەندێکی ئابوری و بازرگانی هاوبەشی کوردستان و سکۆتلەندا لە نزیکترین دەرفەتدا ڕێکبخه‌ن به‌ئامانجی دروستکردنی سه‌کۆیه‌ک بۆ کۆمپانیا و وەبەرهێنەرانی هەردوولا بۆ ئاڵوگۆڕی ئه‌زموون و خستنه‌ڕووی سیاسه‌ت و ستراتیجی وه‌به‌رهێنان و بازرگانی و گه‌ڕان به‌دوای ده‌رفه‌ته‌کانی بازرگانی و وەبەرهێنانی و هاوبه‌شی نێوان هەردوولا.

هەردوو کاربەدەستی حکومەتی سکۆتلەندا خۆشحاڵی خۆیان بۆ دیدارەکە و هەماهەنگی زیاتر نیشاندا، هاوکات هاوڕای پێشنیازه‌که‌ی نوێنه‌ری حکومه‌تی هه‌رێمی کوردستان بوون تایبه‌ت به‌ کۆڕبه‌ندی ئابووری و بازرگانی هاوبه‌ش کە خزمەت بە ئابوری و بازرگانی هەردوو هەرێم بگەیەنێت، وه‌ ڕایانگه‌یاند که‌ پێشوازی لە سەردانی شاندێکی بازرگانی هەرێمی کوردستان ده‌که‌ین بۆ ئەوەی لە نزیکەوە وه‌به‌رهێنه‌ران و بازرگانان تاوتوێی سیاسه‌ت و ده‌رفه‌ته‌کان و لایەنەکانی هەماهەنگی نێوان هەردوولا بە ووردەکاری زیاترەوە بکه‌ن.

 ٦  شوباتی ٢٠٢٥