شاندێکی حکومەتی هەرێم بەشداری لە کۆنفرانسی بەهارەی ساڵانەی ئەنجومەنی کاری عیراق-بەریتانیا دەکات

شانشینی یەکگرتوو، لەندەن، www.uk.gov.krd. شاندێکی هەرێمی کوردستان کە پێکهاتبوو لە دکتۆر محمد شوکری سەرۆکی دەستەی وەبەرهێنان و گوهدار شێخۆ سەرپەرشتیاری ئیدارەی سەربەخۆی زاخۆ و کەریم سلێمان بریکاری وەزارەتی کشتوکاڵ و سەرچاوەکانی ئاو و کاروان جمال تاهیر نوێنەری حکومەتی هەرێم لە بەریتانیا و ژمارەیەك لە کاربەدەستانی حکومەت و کۆمپانیا و پیاوانی کاری کوردستان بەشداری لە کۆنفرانسی بەهارەی ساڵانەی ئەنجومەنی کاری بەریتانیا-عیراق کرد کە لە (Mansion House) لەلەندەن بەڕێوەچوو.

لە دانیشتنی دەستپێکی کۆنفرانسەکەدا کە حەیان عەبدولغەنی وەزیری نەوتی عیراقی فیدراڵ و ژمارەیەك لە کاربەدەستانی حکومەتی فیدرالی و پیاوانی کاری عیراق و بەریتانیا بەشداربوون، دکتۆر محمد شوکری سەرۆکی دەستەی وەبەرهێنانی هەرێمی کوردستان لە ووتارێکیدا تێڕوانینی حکومەتی هەرێمی لە بواری وەبەرهێنان لە هەرێمی کوردستان خستە ڕوو، هاوکات تـیـشـکـی خـسـتـەسـەر ژینگه‌ی بـازرگـانـی و ئـابـووری و وەبـەرھــێـنـان لـە ھـەرێـمـی کـوردسـتـان لـە گـشـت سـێـکـتـەرەکـانـدا، وه‌ بـە تـایـبـەت لـە کـەرتـەکـانـی کـشـتـوکـاڵـی و گـەشـتوگـوزار و پـیـشـەسـازیـدا کـە له‌ پێشه‌نگییه‌کانی حکومه‌تی هه‌رێمی کوردستاندان و ئاماژەی بە کارئاسانییەکانی حکومەتی هەرێمدا بۆ وەبەرهێنەرانی بیانی.

لە کۆڕبەندەکەدا ژمارەیەك پانێڵی جیاواز بەڕێوەچوون، لە نێویشیاندا پانێڵێك لەسەر هەرێمی کوردستان کە ژمارەیەك لە پیاوانی کار و کۆمپانیا بەریتانیەکان ئامادەبوون. سەرۆکی دەستەی وەبەرهێنانی هەرێمی کوردستان باسی لە سەقامگیری و بوونی ژینگەیەکی باشی وەبەرهێنان و بازرگانی کرد لە هەرێم، هەروەها تیشکی خستە سەر  کارنامەی حکومەتی هەرێم و تێڕوانینی حکومەت بۆ وەبەرهێنان و گۆڕانکاری بەردەوام لە یاسا و ڕێساکانی تایبەت بە وەبەرهێنان لە هەرێمی کوردستان و هانی کۆمپانیا و وەبەرهێنەرە بەریتانیاکانیاندا بۆ ئەوەی سوود لە هەموو ئەو ئاسانکاری و دەرفەتانەی کار لە هەرێمی کوردستان وەربگرن. هەر لە پانێڵەکەدا ژمارەیەك پرسیار و تێبینی لەلایەن ئامادەبوان دەربارەی وەبەرهێنان و ئەو پرس و کێشانەی کە دێنە بەردەم وەبەرهێنەران و ئاسانکارییەکانی حکومەتی هەرێم بۆ زاڵبوون بەسەر هەموو کێشەکان تاوتوێکران.

لەندەن
١-٢ی تەمووزی ٢٠٢٤