نوێنەری حکومەتی هەرێم بەشداری لە بۆنەی رۆژی نیشتیمانی کاتالۆنیا دەکات

لەندەن، شانشینی یەکگرتوو،www.uk.gov.krd . کاروان جمال تاهیر نوێنەری حکومەتی هەرێمی کوردستان لە بەریتانیا بەشداری لە رێورەسمێکی تایبەت بەبۆنەی رۆژی نیشتیمانی کاتالۆنیا کرد و لەلایەن فرانسێس کلارێت نوێنەری هەرێمەکە لە بەریتانیا بە گەرمی پێشوازی لێکرا.

نوێنەری حکومەتی هەرێم پیرۆزبایی حکومەتی هەرێمی گەیاندە گەل و حکومەتی کاتالۆنیا و هیوای پێشکەوتن و گەشەسەندنی بەردەوامی هەرێمەکەی خواست.

لەلای خۆیەوە نوێنەری کاتالۆنیا سوپاسی پەیامەکەی نوێنەری حکومەتی هەرێمی کوردستان کرد و تیشکی خستە سەر گرینگی پەیوەندیە دووقۆڵیەکان و هەماهەنگی بەردەوامی نێوان هەرێمی کوردستان و کاتالۆنیا و بەردەوامبوونی بۆ زیاتر بەهیزکردنی پەیوەندیکانی نێوانیان.

 هەر لە بۆنەکەدا کاروان جمال تاهیر چاوی کەوت بە ژمارەیەك دیبلۆماتکار و کاربەدەستانی حکومەتی بەریتانیا و نوێنەرانی ژمارەیەك لە کۆمپانیا و دامەزراوە ئابوری و بازرگانیەکان و گفتوگۆ لەسەر دوایین پەرەسەندنەکانی دۆخی هەرێمی کوردستان و عیراق و ناوچەکە بە گشتی و چۆنیەتی گەشەپێدانی پەیوەندیە دووقۆلیەکان.

لەندەن
٨ی ئەیلولی ٢٠٢٥