نوێنەری حکومەتی هەرێمی کوردستان بەشداری لە یادەوەری ٣٦ ساڵەی کیمیابارانکردنی هەڵەبجە دەکات

شانشینی یەکگرتوو، پۆرتسمەس، www.uk.gov.krd. رێكخراوی ماڵی کورد لە شاری پۆرتسمەس بە بۆنەی تێپەڕبوونی ٣٦ ساڵ بەسەر کارەساتی کیمیابارانکردنی هەڵەبجە بۆنەیەکیان له‌ مۆزه‌خانه‌ی D-Day رێکخست بە بەشداری کاروان جمال تاهیر نوێنەری حکومەتی هەرێمی کوردستان و تۆم کڵۆس لۆردی شارەداری پۆرتمەس و هاوسەری شاره‌دار خاتوو نیکی کڵۆس و ژمارەیەك پەرلەمانتاران و ئەندامانی حکومەتی خۆجێی شارەکە و نوێنه‌ری پارته‌ سیاسییه‌کان و ژماره‌یه‌ک له‌ ئەندامانی کۆمەڵگه‌ی کوردی.

نوێنەری حکومەتی هەرێم لە ووتەیەکیدا هێمای بۆ ئه‌وه‌دا که‌ " زۆرێک له‌ سه‌ربازانی هاوپه‌یمانان له‌ جه‌نگی جیهانی دووه‌م له‌م که‌نارئاوانه‌ کۆتایی به‌ژیانیان هات و قوربانی زۆریان دا، بۆ ئه‌وه‌ی ئه‌وروپا له‌ سته‌مکاری ڕزگاریبێت و له‌ژێر سایه‌ی دیموکراسیدا بژین. به‌هه‌مانشیوه‌ش زۆرێک له‌ کورده‌كان بونه‌ قوربانی بۆ ئه‌وه‌ی دور له‌ سته‌مکاری و به‌ئازادی و دیموکراتی بژین"، وه‌ ووتی ئه‌و قوربانیانه‌ی که‌ بۆ هه‌مان باوه‌ڕ داومانه‌ زیاتربه‌یه‌کمان ده‌به‌ستێته‌وه‌.

هاوکات ئاماژەی بەوەدا کەوا "کارەساتی هەڵەبجە تاوانێكی بێوێنه‌ بوو دژ بە مرۆڤایەتی و پێویستە هەرگیز لە یادی نەکەین و ئەمڕۆ ئێمە بەیەکەوەین بۆ ئەوەی درود بۆ گیانی پاکی قوربانییه‌کان بنێرین ، وە پابەندبوونمان دووپات بکەینەوە بە به‌رده‌وامیمان به‌ گه‌یشتن به‌ دادپەروەری و ناساندنی تاوانه‌کان به‌جینۆسای."

هاوکات شارەداری پۆرتسمەس نیك کڵۆس لە ووتەیەکیدا ووێڕای هاوسۆزی بۆ قوربانییه‌کان شانازی خۆی بە خۆڕاگری گەلی کورد نه‌شارده‌وه‌ و پشتگیری ئەنجومەنی شارەوانی پۆرتسمەسی بۆیان دووپات کردەوە. ووتیشی: "هەموومان بەیەك دەنگ لە دژی گشت جۆرە زوڵم و پاکتاوی نەتەوەیی و تاوانێکین لە دژی مرۆڤایەتی."

له‌ په‌یامێکی ڤیدێۆیدا، سه‌رۆکی فه‌رمانگه‌ی په‌یوه‌ندییه‌کانی ده‌ره‌وه‌ سه‌فین دزه‌یی بۆ ئاماده‌بوان تیشکی خسته‌ سه‌ر جینۆسایدی گه‌لی کورد و نه‌هامه‌تییه‌کان و گرینگی ناساندنی تاوانه‌کان به‌جینۆساید له‌سه‌ڕ ئاستی نێوده‌وڵه‌تی و سوپاسی پشتیوانی به‌رده‌وامی شانشینی یه‌کگرتووی کرد له‌ قۆناغه‌کانی خه‌باتی کوردستان.

هه‌روه‌ها په‌رله‌مانتار ستیڤن مۆرگان له‌وته‌یه‌کیدا هاوخه‌می بۆ ئه‌وکاره‌ساته‌ گه‌وره‌یه‌ ده‌ربڕی که‌ده‌رهه‌ق به‌گه‌لی کورد کراوه‌ و ڕایگه‌یاند که‌ کۆمه‌ڵگه‌ی نێوده‌وڵه‌تی ده‌بێت دان به‌وجینۆسایدانه‌دا بنێت که‌ له‌ جیهاندا ڕویانداوه‌، هاوکات ستایشی ڕۆڵی کۆمه‌ڵگه‌ی کوردستانی کرد له‌شاری پۆرتسمس بۆ به‌شداری کارایان و ئه‌و خزمه‌تانه‌ی به‌ شاره‌که‌ی ده‌گه‌یه‌نن.

هه‌ر له‌ یاده‌که‌دا په‌رله‌مانتار و سه‌رکرده‌ی په‌رله‌مانی به‌ریتانیا پێنی مۆردانت له‌ په‌یامێکدا هاوسۆزی خۆیان بۆ ئه‌و یاده‌ خه‌مناکه‌ نارد و ڕایگه‌یاند که‌ " له‌ ئێستادا له‌ هه‌موکات زیاتر گرنگتره‌ به‌یه‌که‌وه‌ بوه‌ستین بۆ پاراستنی کۆمه‌ڵگه‌کان و که‌مینه‌کان که‌له‌ژێر هه‌ڕه‌شه‌دان له‌هه‌رشوێنێکی جیهان بن، وه‌تێیدا ڕایگه‌یاند که‌ ئه‌و ڕوداوه‌ دڵته‌زێن و ترسناکه‌ هه‌رگیز نابێت له‌بیربکرێت، ئه‌وانه‌ی بونه‌ قوربانی و ماڵئاواییان کرد، ئه‌وانه‌شی برینداربوون ده‌بێت ببنه‌ وانه‌ بۆمان"

له‌کۆتایدا ڕزگاربووی کاره‌ساتی هه‌ڵه‌بجه‌ کامه‌ران نه‌ورۆز به‌ناوی ماڵی کوردی پۆرتسمس و ڕزگاربویه‌کی کیمیابارانی هه‌ڵه‌بجه‌ له‌ ووته‌یه‌کیدا سوپاسی ئاماده‌بوانی کرد و ڕایگه‌یاند که‌ دانپێدانانی جینۆساید بۆ ئه‌وان ئاسوده‌ییان پێده‌به‌خشێت و ڕوحی شه‌هیده‌کانیان و قوربانیان شاد ده‌بێت.

‌له‌ کۆتای یاده‌که‌دا بانگهێشتی ئاماده‌بوان کرا بۆ دانانی تاجه‌گوڵینه‌ له‌ باخچه‌ی تایبه‌ت به‌ قوربانیانی هه‌ڵبجه‌ له‌ باخچه‌ی قوربانیانی جه‌نگی جیهانی دووه‌م.

پۆرتسمەس
١٧ی ئازاری ٢٠٢٤