بەرپرسی فەرمانگەی پەیوەندیەکانی دەرەوە پێشوازی لە شاندێکی گرووپی APPG پەرلەمانی بەریتانیا دەکات
هەواڵ : 4/11/2025
هەرێمی کوردستان، هەولێر، www.uk.gov.krd. سەفین موحسین دزەیی، بەرپرسى فه‌رمانگه‌ى پەیوەندییەکانى دەرەوە،
پێشوازى لە گرووپى دۆستایه‌تی لەگەڵ هه‌رێمی کوردستان له په‌رله‌مانی به‌ریتانیا (APPG)بە سەرۆکایەتيى په‌رله‌مانتار جۆن سلینگەر و ئەندامییەتی بارۆنێس فیۆنا
هۆجسن کرد.
لە کۆبوونەوەکە کە کاروان جەمال
تاهیر، نوێنەرى حکومەتى هەرێم لە بەریتانیا ئامادەى بوو، بەرپرسی فەرمانگەی
پەیوەندیەکانی دەرەوە پوختەیەکى لەسەر بارودۆخى هەرێمى کوردستان و قۆناغە سەخت و
دژوارەکان پێشکەشکرد، وە سوپاسی گرووپەکەی کرد کە هەمیشە پاڵپشتیيان لە ئەزموونى
هەرێمى کوردستان کردووە و لەکاتى پێویست هاوکار بوونە.
هەر لە دیدارەکەدا سەفین دزەیی
ئاماژەی بە پێکەوەژیانی ئاشتیيانەى نێوان ئایین و نەتەوەکان کرد لە ناوچەیەکی پڕ
لە کێشە و ململانێدا. تیشکیشی خستە سەر ئەو مەترسی و ئاستەنگانەی کە ڕووبەڕووی
هەرێمی کوردستان دەبنه‌وه، بە تایبەتیش پەرەسەندنەکانی ناوچەکە و مەترسيی دروستکردنی
کاریگەری لەسەر ئاوارە بوون بەهۆی ململانێکان.
لەلای خۆیەوە، جۆن سلینگەر سەرۆکی
گرووپەکە جەختی لەسەر پابەندبوونی وڵاتەکەی کردەوە بۆ قووڵکردنەوەی هاوکاری و بنیادنانی هاوبەشی لە
بوارەکانی وەک گەشەپێدانی ئابووری، گەشتیاری و چاکسازی لە خزمەتگوزارییە
گشتیەکاندا. هەروەها پێزانینی خۆی بۆ ئەو ڕۆڵە دەربڕی کە حکومەتی هەرێمی کوردستان
لە ئاشتی و سەقامگیريی ناوچەکەدا دەیگێڕێت.
هەولێر- هەرێمی کوردستان
١١ی نیسانی ٢٠٢٥