نوێنەری حکومەتی هەرێم چاوی دەکەوێت بە پەرلەمانتار بامبۆس چارالامبۆس

لەندەن، پەرلەمانی بەریتانیا، شانشینی یەکگرتوو، www.uk.gov.krd. کاروان جمال تاهیر نوێنەری حکومەتی هەرێمی کوردستان لە بەریتانیا لە تەلاری پەرلەمان چاوی کەوت بە بامبۆس چارالامبۆس ئەندامی پەرلەمانی بەریتانیا لە پارتی کار و وەزیری پێشووی ڕۆژهەڵاتی ناوەراست لە حکومەتی سێبەر.

لە دیدارەکەدا گفتوگۆ دەربارەی دوایین پێشهات و پەرەسەندنەکان لە هەرێمی کوردستان و عیراق و ناوچەکە و پەیوەندیە دووقۆڵیەکانی نێوان هەرێمی کوردستان و بەریتانیا کرا.

نوێنەری حکومەتی هەرێمی کوردستان سوپاسی هەڵوێست و پشتگیری بەردەوامی پەرلەمانتاری ناوبراو و پارتی کاری کرد لە پاڵپشتی بەردەوامیان لە پێگە و مافەکانی هەرێمی کوردستان و پاراستنی ئەمن و ئاسایش و سەقامگیری و گەشەسەندنی هەرێم. هاوکات جەختی لەسەر گرینگی کاری هاوبەش و پێکەوەیی کردەوە بەمەبه‌ستی بەهێزترکردنی پەیوەندیە دوولایه‌نه‌کانی نیوان هەرێمی کوردستان و شانشینی یەکگرتوو.

لەلای خۆیەوە پەرلەمانتار بامبۆس چارالامبۆس خۆشحاڵی خۆی بە دیدارەکە نیشاندا و ئامادەباشی بۆ هەر جۆرە هەماهەنگیەك دووپات کردەوە بەمەبەستی کۆکردنەوەی پشتگیری زیاتر لە هەرێمی کوردستان و گەیاندنی کێشە و گرفتەکان کە هەرێم رووبەروویان دەبێتەوە بۆ پەرلەمان و حکومەتی بەریتانیا. جەختیشی لەسەر بەردەوامبوونی خۆی کردەوە لە رۆڵ بینین و بەشداریکردن لە گرووپەکانی پشتگیری لە هەرێمی کوردستان لە پەرلەمانی ووڵاتەکەی و گەشەپێدانی پەیوەندیەکانی نێوان هەرێم و شانشینی یەکگرتوو.

لە کۆتایی دیدارەکەشدا هەردوولا جەختیان لەسەر بەردەوامی دیدار و کۆبوونەوەکانیان کردەوە لە داهاتوودا.

لەندەن، تەلاری پەرلەمانی بەریتانیا
٥ی ئەیلولی ٢٠٢٤