نوێنەری حکومەتی هەرێم لەگەڵ تیمی عیراق لە وەزارەتی دەرەوەی بەریتانیا کۆدەبێتەوە

لەندەن، شانشینی یەکگرتوو،  www.uk.gov.krd. کاروان جمال تاهیر نوێنەری حکومەتی هەرێمی کوردستان لە بەریتانیا نیوەڕۆخوانێکی بۆ تیمی عیراق لە وەزارەتی دەرەوەی بەریتانیا رێکخست.

لە دانیشتنێکدا کە ئەلێکس کۆکەر سەرۆکی تیم و ئۆوین تەکەر بەرپرسی دۆسیەی هەرێمی کوردستان و ئەندامانی تیمەکە بەشداربوون گفتوگۆ دەربارەی دوایین رووداو و پێشهاتەکان لە هەرێمی کوردستان و عیراق و ناوچەی رۆژهەڵاتی ناوەراست و پەیوەندیە دووقٶڵیەکانی نێوان هەرێمی کوردستان و بەریتانیا کرا و جەخت لەسەر هەماهەنگی بەردەوامی نێوان هەردوولا کرایەوە بەمەبەستی زیاتر پته‌وکردنی هاوبەشیەکان و هه‌ماهه‌نگییه‌کانی نێوان هەردوولا. هاوکات تیشك خرایە سەر پەیوەندیەکانی نێوان هەولێر و بەغدا و جەخت لەسەر ڕۆڵی کاریگەری بەریتانیا کرایەوە بۆ هاریکاریکردنی هەردوولا بۆ گەیشتن بە رێکەوتنێکی بەردەوام لەسەر هەموو کێشەکان.

شاندی وەزارەتی دەرەوەی بەریتانیا خۆشحاڵی خۆیان بە دیدارەکە دووپات کردەوە و جه‌ختیان له‌سەر پابەندییه‌کانی وڵاتەکەیان کرده‌وه‌ به‌رامبه‌ر به‌ هه‌رێمی کوردستان و ئارامی و سه‌قامگیری ئەو هەرێمە.

لەندەن
٢٩ی ئایاری ٢٠٢٤