نوێنەرایەتی حکومەتی هەرێم ڕۆژی جیهانی خانمان بەرز ڕادەگرێت

Alternate Text هەواڵ : 3/9/2023

بە بۆنەی ڕۆژی جیهانی خانمان، کاروان جمال تاهیر نوێنەری حکومەتی هەرێمی کوردستان لە بەریتانیا و خاتوو ڤیان سابیری هاوسه‌ری، پێشوازیان له‌ ژماره‌یه‌ک خانمی کاراو و چالاکی کۆمه‌ڵگه‌ی کوردی کرد له‌ بواره‌کانی که‌لتووری و ڕۆشنبیری و ئەکادیمی، هه‌روه‌ها نوێنەرانی پارتە سیاسیەکان و چالاکوانەکان و خاوەن کارەکان.

له‌ بۆنه‌که‌دا نوێنەری حوکمەتی هەرێم پیرۆزبایی گه‌رمی له‌ خانمانی جیهان و هه‌رێمی کوردستان و خانمانی ئامادەبوو کرد و دەستخۆشی لێکردن بۆ ڕۆڵی دیاریان و دەسکەوتەکانیان ووتی: " دیاری کردنی ڕۆژێکی تایبه‌ت بۆ ژنان له‌لایه‌ن نه‌ته‌وه‌ یه‌کگرتووه‌کان، چه‌ند ڕه‌هه‌ندێکی مێژووی هه‌یه‌ و دانپیادانان و پێزانینه‌ بۆ خه‌باتی ئافره‌تان بۆ مافه‌کانیان، هاوکات به‌رز ڕاگرتنی ئه‌و ده‌ستکه‌وتانه‌یه‌ که‌ به‌ده‌ستیان هێناوه‌ له‌ بواره‌کانی کۆمه‌ڵایه‌تی، ئابووری که‌لتووری و سیاسی، بۆیه‌ شانازی ده‌که‌ین که‌له‌م ڕۆژه‌دا پێکه‌وه‌ ئه‌و ده‌ستکه‌وتانه‌ی که‌ به‌ده‌ست هاتوون به‌رز ڕابگرین." 

نوێنه‌ری حکومه‌ت لە درێژەی قسەکانی دا ووتی " پێگه‌ی ژنان و کچان له‌ مێژووی گه‌لی کورد و شۆڕشه‌ یه‌ک له‌دوای یه‌که‌کان پرشنگدار و دیاره‌، له‌ خه‌باتی مه‌ده‌نی و کۆمه‌ڵایه‌تی، خه‌باتی شار و شاخ، هه‌روه‌ها له‌ سه‌رده‌می حوکمڕانیشدا به‌ به‌رده‌وامی کاریگه‌ری و ڕۆڵی دیاریان هه‌بووه‌ وه‌ حکومه‌تی هه‌رێم و دامه‌زراوه‌ مه‌ده‌نییه‌کانی ژنان پێکه‌وه‌ به‌ به‌رده‌وامی کار لەسەر گەشەدان بە پێگە و ڕۆڵیان ده‌که‌ن، وه‌ هه‌وڵ ئه‌ده‌ن بۆ که‌مکردنه‌وه‌ی ئاسته‌نگییه‌کانی به‌رده‌م گه‌شه‌ی زیاتریان، هاوکات هه‌ڵمه‌تی به‌رده‌وام هه‌یه‌ بۆ ڕێگەگرتن لە توند و تیژی به‌رامبه‌ر ژنان و کچان"

لە کۆتایی قسەکانی دا، نوێنەری حکومەتی هەرێم ووتی "دەتوانین کاری زیاتر بکەین بۆ ئەوەی کۆمەڵگایەك بنیاد بنێین کە تیایدا خانمان ده‌رفه‌تیان هه‌بێت ڕۆڵی خۆیان ببینن، پێگه‌ی خۆیان زیاتر به‌هێز بکه‌ن و کۆمەڵگایەك دروست بکەین دوور بێت لە توند و تیژی دژ بە ئافرەتان و کچان."

له‌ بۆنه‌که‌دا گفتووگۆ و پیشنیاری به‌سوود خرایه‌ ڕوو له‌لایه‌ن ئاماده‌بوان به‌ ئامانجی که‌مکردنه‌وه‌ی ئاسته‌نگییه‌کان و بینینی ڕۆڵی زیاتر له‌لایه‌ن خانمان له‌ گشت بواره‌کاندا.