نوێنەری حکومەتی هەرێمی کوردستان پێشوازی لە سەرۆکی رێکخراوی ژیار دەکات.

شانشینی یەکگرتوو، لەندەن، www.uk.gov.krd. کاروان جمال تاهیر نوێنەری حکومەتی هەرێمی کوردستان لە بەریتانیا پێشوازیکرد لە پرۆفیسۆر د. خالد محمد سەرۆکی رێکخراوی ژیار بۆ پەروەردە و گەشەپێدانی مرۆیی و جەبار دوکانی سەرۆکی لقی رێکخراوەکە لە بەریتانیا.

سەرۆکی رێکخراوەکە پوخته‌یه‌کی ده‌رباره‌ی کارو ئامانجەکانی ڕێکخراوه‌که‌یان پێشکەشکرد و تیشكی خستە سەر گرینگی هەماهەنگی رێکخراوەکەیان لەگەڵ نوێنەرایەتی حکومەتی هەرێمی کوردستان لە بەریتانیا.

نوێنەری حکومەتی هەرێمی کوردستان خۆشحاڵی خۆی بە دیدارەکە دەربڕی و ئاماژەی بە رۆڵی گرینگی رێکخراوە کوردیەکان لە بەریتانیادا لە خزمەتکردنی کەلتور و ناسنامەی کوردستان و بەرژەوەندیەکانی دیاسپۆرای کوردستان لە بەریتانیا. هاوکات ئامادەباشی نوێنەرایەتی دووپات کردەوە لەگەڵ رێکخراوی ژیار و کۆمەڵە و رێکخراوەکانی تری کۆمەڵگای کوردی لە بەریتانیا بەمەبەستی گەیاندنی نەهامەتیەکانی گەلی کوردستان و ناساندنیان بە کۆمەڵگاکانی تری بەریتانیا، هاوکات پاراستنی کەلتوور و زمانی کوردانی دانیشتووی بەریتانیا.

هەر لە دیدارەکەدا جەخت لەسەر هەماهەنگی زیاتر لە داهاتوودا کرایەوە.
.
نووسینگەی نوێنەرایەتی، لەندەن
١٥ی تشرینی یەکەمی ٢٠٢٥