نوێنەرایەتی حکومەتی هەرێم ئێوارە پێشوازییەك بە بۆنەی جەژنی نەتەوەیی نەورۆز ساز دەکات

لەندەن، شانشینی یەکگرتوو، www.uk.gov.krd. بە بۆنەی سەری ساڵی نوێی کوردی و جەژنی نەورۆز، نوێنەرایەتی حکومەتی هەرێمی کوردستان لە بەریتانیا ئێوارە پێشوازییەکی سازکرد بە ئامادەبوونی فەلاح مستەفا یاریدەدەری سەرۆکی هەرێمی کوردستان بۆ کاروباری پەیوەندیە نێودەوڵەتیەکان و پەرلەمانتار جۆن سلینگەر سەرۆکی گرووپی دۆستایەتی کوردستان لە پەرلەمانی بەریتانیا، باڵێۆز و دیپلۆماتکاران کاربەدەستانی حکومەتی بەریتانیا و دامەزراوە و ڕێکخراوەکان و دۆستانی گەلی کورد و ڕەوەندی کوردستانی. سەرەتای ئاهەنگەکە بە ووتنەوەی سروودی نەتەوەیی نەورۆز لەلایەن ئامادەبوان و بە بەشداری تیپی مۆسیقای بەشداربوو دەستی پێکرد.

دواتر کاروان جمال تاهیر نوێنەری حکومەتی هەرێمی کوردستان لە ووتارێکیدا به‌گه‌رمی پیرۆزبایی نه‌ورۆز و ساڵی نوێی کوردی لە ئامادەبوان کرد و ڕایگه‌یاند که‌ جێگه‌ی خۆشحاڵیمانه‌ که‌ نه‌ورۆز به‌شێوه‌یه‌کی فراوانتر و له‌ شوێنه‌ گرینگ و کاریگه‌ره‌کان پێشوازی له‌ نه‌ورۆز ده‌کرێت، ئه‌وه‌ش ئاماژه‌ی دۆستایه‌تیه‌ له‌گه‌ڵ گه‌لی کوردستان،  هاوکات سوپاسی حکومه‌تی به‌ریتانیا و په‌رله‌مانتاران و لۆرده‌کان کرد له‌هه‌وڵی به‌رده‌وامیان بۆ به‌هێزکردنی په‌یوه‌ندی له‌گه‌ڵ هه‌رێمی کوردستان. ووتیشی نەورۆز مانای دووبارە لەدایکبوونەوەی هیوا و ئاواتەکان و ئاشتی و ئارامی ژیانە و هیوای خواست نەورۆزی ئەمساڵ ببێتە مایەی پێشکەوتن و ئازادی بۆ گەلی کوردستان.

هه‌ر له‌ بۆنه‌که‌دا پەرلەمانتار جۆن سلینگەر سەرۆکی گرووپی دۆستایەتی کوردستان لە پەرلەمانی بەریتانیا پیرۆزبایی نه‌ورۆزی ئاراسته‌ی ئاماده‌بوان کردو به‌ بایه‌خه‌وه‌ له‌سه‌ر په‌یوه‌ندیه‌کانی نێوان به‌ریتانیا و هه‌رێمی کوردستان دواو تیشکی خسته‌ سه‌ر به‌هاکانی گه‌لی کوردستان له‌ پێکه‌وه‌ ژیان و لێبورده‌یی و به‌تایبه‌تی مامەڵەی مرۆڤانه‌ی حکومەتی هەرێمی کوردستانی لەگەڵ پەنابەر و ئاوارە ناوخۆییەکان لەو کاتانەی کە گرژی و تەنگژەکان روویان لە ناوچەکە کردبوو.

دواتر فەلاح مستەفا یاریدەدەری سەرۆکی هەرێمی کوردستان بۆ کاروباری پەیوەندیەکانی دەرەوە جەژنە پیرۆزەی نه‌ورۆز و ساڵی نوێی لە ئاماده‌بوان کرد و ڕایگه‌یاند که‌ جێگه‌ی خۆشحاڵییه‌ که‌ ده‌بینین کوردستانیان و کۆمه‌ڵگه‌ی به‌ریتانی پێکه‌وه‌ ئاهه‌نگی جه‌ژنی نه‌ورۆز ده‌گێڕن و هه‌رێمی کوردستان به‌ بایه‌خه‌وه‌ ده‌ڕوانێته‌ په‌یوه‌ندی و هه‌ماهه‌نگییه‌ به‌هێزه‌کانی له‌گه‌ڵ شانشینی یه‌کگرتوو، وە سوپاسی هاوکاری و پاڵپشتیە به‌رده‌وامه‌کانی حکومەتی بەریتانیای کرد بۆ هەرێمی کوردستان.

هه‌ر له‌بۆنه‌كه‌دا به‌ ئاماده‌بوونی تیمێکی هونه‌ری و ژه‌نیار له‌گه‌ڵ ده‌هۆڵ و زوڕنای تایبه‌تی فه‌رهه‌نگی کوردی ڕوحی ڕاسته‌قینه‌ی نه‌ورۆزیان له‌ بۆنه‌ پێشوازییه‌که‌دا به‌رجه‌سته‌کرد و ئاماده‌بوانیان شادمان کرد.

لەندەن
٢٦ی ئاداری ٢٠٢٥.