نوێنەری حکومەتی هەرێم لەگەڵ سەرۆك و جێگری سەرۆکی پارتی پارێزگارانی یەکێتیخوازی سکۆتلەندا کۆدەبێتەوە

شانشینی یەکگرتوو، پەرلەمانی سکۆتلەندا، www.uk.gov.krd. کاروان جمال تاهیر نوێنەری حکومەتی هەرێمی کوردستان بە سەرۆکایەتی شاندێكی نوێنەرایەتی سەردانی هەرێمی سکۆتلەندای کرد و ژمارەیەك دیداری ئەنجامدا.

لە میانەی سەردانەکەدا دیدارێکی لەگەڵ رەسڵ فیندلەی سەرۆکی پارتی پارێزگارانی یەکێتیخوازی سکۆتلەندا و پام گۆساڵ جێگری سەرۆکی پارتەکە و وه‌زیری وه‌به‌رهێنان له‌ کابینه‌ی سێبه‌ر ئەنجامدا.

کاروان جمال تاهیر پوخته‌یه‌کی دەربارەی پێگەی دەستوری هەرێمی کوردستان لە عیراقی فیدرالدا پێشکەشکرد و باسی لە دۆخی هەنووکەیی هەرێمی کوردستان و عیراق و ناوچەکە و گۆرانکاریەکان و کاریگەرییان لەسەر هەرێمی کوردستان و ناوچەکە . هاوکات تیشکی خستە سەر ئاسته‌نگه‌ فیدڕاڵییه‌کان، لەوانەش بودجەی هەرێم و  مووچەی فەرمانبەران و ماددەی ١٤٠ و ژمارەیەك پرسی تر.

هەر لە دانیشتنەکەدا نوێنەری حکومەتی هەرێمی کوردستان تیشکی خسته‌ سه‌ر گرینگی هەرێمی سکۆتلەندادا لە شانشینی یەکگرتوو، وە چۆنیەتی بەهێزترکردنی پەیوەندیەکانی نێوان هەرێمی کوردستان و هەرێمی سکۆتلەندا، بە تایبەتیش لە ڕووەکانی ئابوری و کەلتووری و په‌ره‌پێدان. هاوکات سوود وەرگرتن لە شارەزایی و ئه‌زموونی سکۆتلەندا.

هه‌ر له‌دیداره‌که‌دا نوێنه‌ری حکومه‌تی هه‌رێم به‌گرینگی زانی که‌ په‌یوه‌ندییه‌کی په‌رله‌مانی له‌سه‌ر بنه‌مای گۆڕینه‌وه‌ی شاره‌زایی و ئه‌زموون له‌نێوان په‌رله‌مانی هه‌ڕدوولا بونیاتبنرێت.
له‌به‌شێکی تری دیداره‌كه‌، نوێنه‌ری حکومه‌تی هه‌رێم تیشکی خسته‌ سه‌ر رۆڵی گرینگی دیاسپۆڕای کوردستانی له‌ سکۆتله‌ندا و به‌شدارییان له‌ بواری سیاسی و ڕێکخراوه‌یی و گه‌شه‌ی ئابووری له‌ناو کۆمه‌ڵگای سکۆتله‌ندی.

سەرۆك و جێگری سەرۆکی پارتی پارێزگاران خۆشحاڵی خۆیان بە دیدارەکە دەربری و باسیان لە لێكچوونی هەردوو هەرێمی سکۆتلەندا و هەرێمی کوردستان کردەوە کە دەتوانرێت لە زۆر رووەوە کاری هاوبەش ئه‌نجام بده‌ن، بە تایبەتیش لە بابەتەکانی په‌یوه‌ندی پەرلەمانی، په‌یوه‌ندی زانکۆکان و هه‌روه‌ها په‌ره‌پێدانی ئابووری، وه‌ هه‌ماهه‌نگی له‌ بواری کشتوکاڵ و پیشه‌سازیدا. ئەوەشیان دووپات کردەوە کە لە ناو پەرلەمانی هەرێمەکەیان هاریکار دەبن بۆ ئەوەی گرووپێکی پشتگیری لە هەرێمی کوردستان دروست بکەن دوا بە دوای هەڵبژاردنەکانی داهاتووی پەرلەمانی سکۆتلەندا.

سه‌رۆک و جێگری پارتی پارێزگارانی یەکێتیخواز جەختیان لەسەر هەماهەنگی و دیداری بەردەوام کردەوە بەمەبەستی هاندانی کۆمپنیاکانی سکۆتلەندا، بە تایبەتیش لە بوارەکانی وزه‌، تەکنەلۆژیا و کشتوکاڵ بۆ ئەوەی پەیوەندیەکی تۆکمەی بازرگانی لە نێوان هەردوولا دروست ببێت.

تایبه‌ت به‌ ئاڵوگۆڕی که‌لتووری، هه‌ردوولا هاوڕابوون له‌ گرینگی په‌یوه‌ندییه‌ که‌لتوورییه‌كان و داوایان له‌ نوێنه‌رایه‌تی حکومه‌تی هه‌رێمی کوردستان کرد که‌ هەرێمی کوردستان بەشداری لە فیستیڤاڵی ساڵانەی کەلتوری ئەدەنبرە بکات که‌ ساڵانه‌ له‌مانگی ئابدا به‌ڕێوه‌ده‌چێت.

لە کۆتایی دیدارەکەدا هەردوولا جەختیان لەسەر پەیوەندیەکی بەهێز و هەماهەنگی بەردەوام کردەوە.

پەرلەمانی سکۆتلەندا
٧ی شوباتی ٢٠٢٥