شاندێکی هەرێمی کوردستان بەشداری لە بۆنەی ساڵانەی بازاری گەشتی جیهانی لە پێشانگای ئێکسێڵ دەکات

شانشینی یەکگرتوو، لەندەن، www.uk.gov.krd. بە یاوەری کاروان جمال تاهیر نوێنەری حکومەتی هەرێمی کوردستان لە بەریتانیا، شاندێکی بازرگانی هەرێمی کوردستان بە سەرۆکایەتی د. محەممەد شەهاب، سەرپەرشتیاری یەکێتی ژوورەکانی بازرگانی و پیشەسازی کوردستان و ئەندامیەتی نوێنەرانی ژوورەکانی بازرگانی هەولێر و سلێمانی و دهۆك بەشداریانکرد لە پێشانگای ساڵانەی بازاری گەشتوگوزاری جیهانی لە پێشانگای ئێکسێڵ لە شاری لەندەن.
لەو بۆنە نێودەوڵەتیەدا ژمارەیەکی زۆری ووڵاتانی جیهان ستاندی تایبەتی خۆیان هەیە و کاری بەبازارکردن و ناساندنی سێکتەری گەشت و گوزار لە ووڵاتەکانیان پێشکەش بە بەشداربوان دەکەن، هاوکات ژمارەیەك کۆڕ و سیمینار و دیداری تایبەت بە نوێنەرانی ئەو سێکتەرە لە ووڵاتانی جیهان و کۆمپانیا نێودەولەتیەکان لە بواری پیشەسازی گەشتوگوزار ئەنجام دەدرێت و هەلێکی باشە بۆ بەهێزترکردنی په‌یوه‌ندی بازرگانی و راکێشانی وەبەرهێنان و سەرنجی گەشتیاران و کۆمپانیاکانی ئەو بوارە.
شاندی بازرگانی هەرێمی کوردستان بە دیدگایەکی تازە و بە ئومێدی ئەوەی لەگەڵ زیاترین ژمارەی کۆمپانیا و گرووپە گەشتیاریەکان دیدار ساز بکەن بەشدارن لەو بۆنەیە، وە هاوکات پلانی بەشداری بەهێزتریان هەیە لە ساڵانی داهاتوودا. لەو سۆنگۆیەشەوە ژمارەیەك دیدار لەگەڵ نوێنەرانی لایەنە پەیوەندیدارەکانی گەشتوگوزاری ووڵاتان و کۆمپانیا بەریتانیا و نێودەوڵەتیەکاندا ئەنجام دەدەن بەمەبەستی سوود وەرگرتن لە شارەزاییەکانیان، وە هەروەها سەرنج راکێشانی لایەنە گەشتوگوزارییەکان بۆ ئەوەی لە کوردستان وەبەرهێنان ئەنجام بدەن و رێگە خۆش بکرێت بۆ سەردانی گرووپە گەشتیاریەکان بۆ هەرێمی کوردستان.
به‌شداری کردن له‌م پێشانگا تایبه‌ته‌ به‌ بازاڕکردنی گه‌شتوگوزار پڕ بایه‌خه‌ و میکانیزمێکی گرینگ ده‌بێت بۆ بره‌ودان به‌و که‌رته‌  وه‌ک یه‌کێک له‌ ئه‌وله‌ویاته‌كانی حکومه‌تی هه‌رێمی کوردستان.
شایانی باسە ساڵانه‌ له‌ گردبونه‌وه‌که‌دا به‌ هه‌زاران کۆمپانیای تایبه‌تی که‌شت و گوزار لە ١٨٨ ووڵاتەوە بەشداری ده‌که‌ن  و زیاتر لە ٦٠ هەزار کەس لە بواری گەشوگوزار سه‌ردانی ده‌که‌ن و  سێ رۆژ بەردەوام دەبێت.

لەندەن، پێشانگاکانی ئێکسێڵ
٥ی تشڕینی دووەمی ٢٠٢٤