نوێنەری حکومەتی هەرێمی کوردستان کتێبخانەی نیشتیمانی بەریتانیا (British Library) بەسەر دەکاتەوە.

لەندەن، شانشینی یەکگرتوو، www.uk.gov.krd. کاروان جمال تاهیر نوێنەری حکومەتی هەرێمی کوردستان سەردانی کتێبخانەی نیشتیمانی بەریتانیای کرد لە شاری لەندەن و لەلایەن دکتۆر مایکڵ ئێردمان سەرۆکی بەشی ڕۆژهەڵاتی ناوەڕاست و ئاسیای ناوەڕاست بە گەرمی پێشوازی لێکرا.

لە میانەی سەردانەکەدا، نوێنەری حکومەتی هەرێم گەشتێکی بەناو کتێبخانەکە و بەشەکانی کرد، بە تایبەتیش بەشی کوردی کە بە سەدان ناونیشان لەخۆ دەگرێت. هاوکات هەردوولا گفتوگۆیەکی بەرهەمداریان ئەنجامدا سەبارەت بە گرینگی هەماهەنگی بەهێز لە نێوان نوێنەرایەتی حکومەتی هەرێم و کتێبخانەی گشتی بەریتانیا و هاریکاریکردنیان بە دابینکردنی پەرتوك و ناونیشانی زیاتر بۆ ئەوەی خوێنەری کورد و غەیرە کورد سەرچاوەی زیاتریان لەبەردەستدا بێت و زانیاری زیاتریان دەست بکەوێت لەسەر کوردستان.

کاروان جمال تاهیر ئاماژەی بەوەدا کەوا مێژوو و زمانی کوردی به‌شێکی گرینگی ڕۆژهه‌ڵاتی ناوه‌ڕاسته‌و زۆرێک خواستی زانیاری زیاترن لەسەر کوردستان، بۆیەش پێویستە بەشەکەی کوردی تایبەتمەندی زیاتری هەبێت و سەرچاوەکان زیاتر بکرێن، لەو سۆنگۆیەشەوە ئامادەباشی نوێنەرایەتی نیشاندا بۆ دابینکردنی ناونیشان و سەرچاوە پێویسته‌کان وەك دیاری بۆ کتێبخانەکە.

لەلای خۆیەوە دکتۆر مایکڵ ئێردمان خۆشحاڵی خۆی بۆ بەسەرکردنەوەکەی نوێنەری حکومەتی هەرێم و  ئامادەباشی بۆ پێشکەشكردنی هاریکاری بەمەبەستی دەوڵەمەندترکردنی بەشی کوردی لە کتێبخانەکە دەربڕی، ووتیشی ئەوانەی کە بە زمانی کوردی قسە دەکەن لە جیهاندا بە گشتی ژمارەیان زۆرن و لە بەریتانیاش کۆمەڵگایەکی گەورەن و بە بەردەوام پێویستیان بە هاریکاری ئەوان هەیە لە ڕووی دابینکردنی سەرچاوەکان، بۆیەش هەموو ئاسانکارییەك دەکەن بۆ ئەوەی سەرچاوە و ناونیشانی زیاتر زیاد بکەن بۆ کتێبخانەکەیان و به‌رده‌ستبێت بۆ توێژینه‌وه‌ و زانیاری زیاتر له‌سه‌ر کوردستان لە گشت بابه‌ته‌کان.

شایانی باسە کتێبخانه‌ی نیشتمانی به‌ریتانیا زیاتر له‌ ده‌ کیلۆمه‌تر ڕه‌فه‌ی و‌ ١٩٠ ملێۆن ناونیشان و سەرچاوە و ئەرشیف لەخۆ دەگرێت و له‌وانه‌ش به‌شی کوردی که‌ خزمەتێکی باش بە کورد و زمانی کوردی دەکات.

لەندەن
٤ی ئازاری ٢٠٢٤