وەزیری ناوخۆی هەرێم بە سەردانێکی فەرمی دەگاتە بەریتانیا

شانشینی یەکگرتوو، لەندەن، www.uk.gov.krd. لەسەر بانگهێشتنامەی فەرمی حکومەتی بەریتانیا، ڕێبەر احمد وەزیری ناوخۆی هەرێمی کوردستان گەیشتە ووڵاتی بەریتانیا و لە سێ ڕۆژی سەردانەکەیەدا بە یاوەری کاروان جمال تاهیر نوێنەری حکومەتی هەرێمی کوردستان لە بەریتانیا ژمارەیەك دیداری لەگەڵ کاربەدەستانی ئەو ووڵاتە و فەرمانگە پەیوەندیدارەکان لە حکومەتی بەریتانیا ئەنجامدا.

لە باڵەخانەی وەزارەتی دەرەوەی بەریتانیا ڕێبەر احمد لەلایەن لۆرد تاریق احمد وەزیری کاروباری باشوری ئاسیا و ڕۆژهەڵاتی ناوەڕاست و باکوری ئەفریقیا و نەتەوەیەکگرتووەکان و مافی مرۆڤ و نێردەی تایبەتی سەرۆك وەزیرانی بەریتانیا بۆ ڕێگەگرتن لە توندی تیژی سێکسی پێشوازی لێکرا. لە دیدارەکەدا گفتوگۆ دەربارەی پەیوەندیە دولایه‌نه‌کانی نێوان هەرێمی کوردستان و بەریتانیا کرا و جەخت لەسەر هەماهەنگی زیاتر کرایەوە بەمەبەستی چارەسەرکردنی کێشەکانی نێوان هەولێر و بەغدا و پاراستنی سەقامگیری ناوچەکە. هەر لە دیدارەکەدا تیشك خرایە سەر پرسەکانی کۆچی نایاسایی و بنبڕکردنی ڕێکخراوەکانی تاوانی ڕێکخراو، هەروەها نیگەرانیەکانی هەردوولا سەبارەت بە هێرشەکانی گرووپە له‌یاسا ده‌رچووه‌کان لە عیراق و هەرێمی کوردستان و دروستکردنی ناسه‌قامگیری.

هه‌ر  له‌چوارچێوه‌ی سه‌ردانه‌که‌یدا، وەزیری ناوخۆی هەرێمی کوردستان لەلایەن تۆم تۆگینهات وەزیری ئاسایشی بەریتانیا له‌ وەزارەتی ناوخۆی بەریتانیا پێشوازی لێکرا. لە دیدارەکەدا هەردوولا جەختیان لەسەر بەهێزترکردنی پەیوەندییەکانی هەرێمی کوردستان و بەریتانیا کردەوە و جەختیان لەسەر بەردەوامبوونی هەماهەنگی و کاری هاوبەشی نێوانیان بۆ بەرەنگاربوونەوەی تیرۆر و تاوانی ڕێکخراو و کۆچی نایاسایی و ماددە هۆشبەرەکان کردەوە. هەر لە دیدارەکەدا تێڕوانینەکان سەبارەت بە دۆخی ئەمنی ناوچەکە و دوایین پێشهات و پەرەسەندنەکان تاوتێکران. جەختیش لەسەر هەماهەنگی بەردەوام کرایەوە بەمەبەستی پاراستنی سەقامگیری ناوچەکە و بەهێزترکردنی پەیوەندیە دووقۆڵیەکان.

هەر لە وەزارەتی ناوخۆی بەریتانیا ، ڕێبەر احمد وەزیری ناوخۆی هەرێمی کوردستان لەلایەن ڕۆبەرت جێنریك وەزیری کۆچ و کۆچبەرانی بەریتانیا پێشوازی لێکرا. لە دیدارەکەدا گفتوگۆ دەربارەی په‌یوه‌ندییه‌ دولایه‌نه‌کانی هه‌رێمی کوردستان و به‌ریتانیا جه‌ختی لێکرایه‌وه‌ که‌ ده‌بێت به‌هێزتربکرێن و تیشک خرایه‌ سه‌ر ئاسته‌نگییه‌کانی که‌ هۆکارن بۆ دروستبوونی ناسه‌قامگیری ئه‌منی و ئابووری و هه‌ردوولا کۆکبوون له‌سه‌ر ئه‌وه‌ی که‌ ده‌بێت هه‌وڵه‌کان چربکرێنه‌وه‌ بۆ چاره‌سه‌رکردنی هۆکاره‌ ڕیشه‌ییه‌کانی گرفته‌کان و له‌ سه‌رچاوه‌وه‌ چاره‌سه‌ربکرێن.

وەزیری ناوەخۆی هەرێم هاوکات چاوی کەوت بە خاتوو نیك نیکۆڵاس سەرۆکی ئاژانسی تاوانی نیشتیمانی. لە دیدارەکەدا ستایشی پەیوەندی بەهێز و هەماهەنگی نێوان هەرێمی کوردستان و بەریتانیا کرایەوە بەمەبەستی ڕێگەگرتن لە تاوانی ڕێکخراو. هاوکات جەخت لەسەر بەردەوامیدان بە هەماهەنگیەکانی نێوان هەردوولاکرایەوە بەمەبەستی ڕێگەگرتن لە تەشەنەکردن و بڵاوبوونەوەی تاوان لە ناوچەکە.

هەر لە چوارچێوەی سەردانەکەیدا وەزیری ناوەخۆی هەرێمی کوردستان لەگەڵ خاتوو جۆسیە دێلڤیس سەۆکی فەرمانگەی ژنان و کچان لە وەزارەتی دەرەوە و گەشەپێدانی بەریتانیا کۆبۆووە. لە دیدارەکەدا گفتوگۆ دەربارەی توند و تیژی لە دژی ئافرەتان و کچان و چۆنیەتی ڕێگەگرتن لەو تاوانانە کرایەوە. هاوکات تیشكی خستە سەر پلانی هه‌رێمی حکومەتی هەرێمی کوردستان لەو بوارەوە و ئاماژەی بەوەشدا کەوا حکومەتی هەرێمی کوردستان بە جیددیەتەوە کار لەسەر ئەو پرسە دەکات و ژمارەیەك یاسای تایبەت بەو پرسە دەرکراون بەمەبەستی ڕێگەگرتن که‌مکردنه‌وانی توندوتیژی به‌رامبه‌ر ژنان و کچان به‌تایبه‌تی ئه‌و توندوتیژی و تاوانانه‌ی له‌ڕێگه‌ی ئۆنلاین ئه‌نجامئه‌درێن.

لەندەن
٦ – ٩ی تشرینی دووەمی ٢٠٢٣