نوێنەری حکومەتی هەرێم بەشداری لە یادەوەرییەکی تایبەت بە دۆستی گەلی کوردستان خاتوو ئان کلۆید دەکات

شانشینی یەکگرتوو، هەرێمی وێڵز، www.uk.gov.krd. کاروان جمال تاهیر نوێنەری حکومەتی هەرێم بە سەرۆکایەتی شاندێکی نوێنەرایەتی بەشداری لە بۆنەیەکی تایبەت کرد بۆ یادکردنەوەی ژیانی پەرلەمانتاری پێشوو و دۆستی هەرە نزیکی کوردستان خاتوو ئان کلۆید کە لە کڵێسای (سەینت ئێلڤان) لە هەرێمی وێڵز بەڕێوەچوو.

لە بۆنەکەدا کە مارك درەیکفۆرد سەرۆك وەزیرانی هەرێمی وێڵز و خاتوو شاناز ابراهیم احمد خانمی یەکەمی عیراق و وەین دەیڤد وەزیری کاروباری ڕۆژهەڵاتی ناوەڕاست و باکوری ئەفریقیا لە حکومەتی سێبەر و ژماره‌ی په‌رله‌مانتار و نوسه‌ر و کۆمه‌ڵگه‌ی مه‌ده‌نی مافی مرۆڤ و خانەوادە و کەس و کار و دۆستانی پەرلەمانتاری کۆچکردوو بەشدار بوون، نوێنەری حکومەتی هەرێمی کوردستان پرسە و سەرەخۆشی حکومەتی هەرێم و گەلی کوردستانی گەیاندە خانەوادە و کەس و کاری کۆچکردوو، جەختیشی لەسەر ئەوە کردەوە کەوا خاتوو ئان کلۆید دۆستێکی هەرە نزیکی کوردستان بوو، وە بەشێکی زۆری لە ژیانی خۆی بۆ پشتگیریکردن لە دۆزە ڕەواکەی کوردستان و بەرگریکردن لە مافەکانی گەلی کوردستان تەرخان کردبوو.

خانەوادەی خاتوو ئان کلۆید سوپاس و پێزانینی خۆیان ئاراستەی نوێنەری حکومەتی هەرێم و شاندی یاوەری کرد بۆ بەشداریکردن لەو بۆنەیە و تەئکیدیان لەسەر ئەوە کردەوە کە لەسەر ڕێچکەی خاتوو ئان کلۆید بەردەوام دەبن بۆ بەرگریکردن لە مافەکانی گەلی کوردستان.

هەرێمی وێڵز
١٣ی تشرینی یەکەمی ٢٠٢٣