نوێنەری حکومەتی هەرێمی کوردستان پێشوازی لە ڕێکخراوی کانگای پەروەردەیی دەکات.

Alternate Text هەواڵ : 6/2/2023

شانشینی یەکگرتوو، لەندەن، www.uk.gov.krd. کاروان جمال تاهیر نوێنەری حکومەتی هەرێمی کوردستان لە بەریتانیا پێشوازیکرد لە دەستەی بەڕێوەبردنی ڕێکخراوی کانگای پەروەردەیی و ژمارەیەك لە بەڕێوەبەرانی ئەو قوتابخانانەی کە لەلایەن ڕێکخراوەکە سەرپەرشتی دەکرێن.

شاندەکە سەرەتا سوپاسی نوێنەرایەتی حکومەتی هەرێمی کوردستانیان کرد بۆ هەموو ئەو پاڵپشتی و پشتگیرییەی کە لە ڕێکخراوە جیاوازەکانی کۆمەڵگای کوردی دەکەن، بە تایبەتیش لە بواری پەروەردە و کەلتوور و زمانی کوردی بەمەبەستی سەرخستنی پڕۆژە و بەرنامەکانیان کە خزمەتێکی گەورە بە زمانی دایك و پاراستنی کەلتووری میلەتەکەمان دەکات. شاندەکە هاوکات کورتەیەکیان دەربارەی کار و بەرنامەی داهاتووی ڕێکخراوەکەیان خستەڕوو و ژمارەیەك بیرۆکه‌ و پێشنیاریان پێشکەشکرد و داوای هاریکاری و پاڵپشتی نوێنەرایەتی حکومەتی هەرێمیان کرد بۆ سەرخستنی کارەکانیان.

کاروان جمال تاهیر نوێنەری حکومەتی هەرێمی کوردستان وێڕای بەخێرهێنانی شاندەکە به‌ڵێنی هه‌ماهه‌نگی و کاری پێکه‌وه‌یی پێدان، هاوکات جەختی لەسەر ئەوە کردەوە کەوا بەشێك لە کارە سەرەکیەکانی نوێنەرایەتی حکومەتی هەرێمی کوردستان ناساندن و پشتگیریکردنە لە هەموو ئەو پڕۆژە و چالاکیانەی کە تایبەتن بە کەلتوور و زمانی کوردی و پەروەردەی منداڵانی کورد، ووتیشی لەو سۆنگۆیەوە و بەهەستکردن بەو بەرپرسیاریەتەوە نوێنەرایەتی حکومەتی هەرێم لە بەریتانیا بە بەردەوامی پێشوازی کردووە لە ڕێکخراو و کەسایەتیەکانی کۆمەڵگای کوردی لە بەریتانیا و گوێی لە پێشنیار و بۆچوونەکانیان گرتووە، هاوکات بەشداریکردووە لەو کار و چالاکیانە و سپۆنسۆری به‌شێکی کردووە.

هەر لە کۆبوونەوەکەدا گفتوگۆیەکی کراوە و تێر و تەسەل دەربارەی ژمارەیەك پێشنیارکرا بەمەبەستی برەودان بە خوێندنگا کوردیەکان و یه‌کخستنی مەنهەجی خوێندن ئەویش بە سوود وەرگرتن لە مەنهەجە فەرمیەکانی خوێندن لە هەرێمی کوردستان کە هەموویان لە ماڵپەڕی وەزارەتی پەروەردەی هەرێمی کوردستان دەست دەکەون، هاوکات تیشك خرایە سەر کێشە و گرفتەکان کە ڕووبەڕووی قوتابخانە کوردیەکان دەبنەوە لە هەموو ڕووەکانەوە. هەر لە دانیشتنەکەدا شاندی ناوبراو پێشنیاری ئەوەیان کرد کە بۆڕدێك یان لیژنەیەکی پسپۆڕی پەروەردەیی پێکبهێندرێت بەمەبەستی سەرپەرشتیکردنی پڕۆسەی خوێندن و قوتابخانە کوردیەکان لە بەریتانیا. کاروان جمال تاهیر پێشنیاریکرد لە ماوەیەکی نزیکدا بەڕێوەبەر و سەرپەرشتیارانی هەموو خوێندنگا کوردیەکان بانگهێشتی نوێنەرایەتی حکومەتی هەرێم ده‌که‌ین به‌ئامانجی ئاڵ و گۆڕکردنی بیر و ڕاکان لەسەر کۆی ئەو پرسانەی کە پەیوەندیان هەیە بە خوێندنی کوردی لە ووڵاتی بەریتانیا.

نوسینگه‌ی نوێه‌رایه‌تی حکومه‌تی هه‌رێم
له‌نده‌ن
٢ ئایاری٢٠٢٣