لۆرد تاریق احمد پێشوازی لە شاندێکی حکومەتی هەرێم دەکات.

لۆرد تاریق احمد وەزیری ده‌وڵه‌ت بۆ کاروباری نه‌ته‌وه‌ یه‌کگرتووه‌کان و مافی مرۆڤ له‌وه‌زاره‌تی ده‌ره‌وه‌ و په‌ره‌پێدانی به‌ریتانیا و نوێنەری تایبەتی سەرۆك وەزیران بۆ نه‌هێشتنی توندوتیژی سێکسی، لە چوارچێوه‌ی کۆنفڕانسی وەزاری نێوده‌وڵه‌تی تایبەت بە ئازادی ئایین و بیر و باوەڕ لە لەنده‌ن پێشوازی لە شاندێکی حکومەتی هەرێمی کوردستان کرد کە پێکهاتبوو لە دکتۆر پشتیوان سادق وەزیری ئەوقاف و کاروباری ئایینی و ئانۆ جوهر عبدلمسیح وەزیری گواستنەوە و گەیاندن وه‌ کاروان جه‌مال تاهیر نوێنه‌ری عکومه‌تی هه‌رێمی کوردستان له‌ به‌ریتانیا.
 له‌دیداره‌که‌دا شاندی هەرێم وێڕای گه‌یاندنی سوپاسگوزاری حکومه‌تی هه‌رێمی کوردستان بۆ هاوکاری و پشتیوانی به‌رده‌وامی حکومەتی بەریتانیا  له‌ هەرێمی کوردستان، هاوکات پیرۆزبایی به‌ستنی کۆنفرانسه‌که‌یان کرد و ڕایانگه‌یاند که‌ شاندی هه‌رێمی کوردستان به‌خۆشحاڵییه‌وه‌ له‌ سه‌ر ئاستێکی باڵا به‌شداره‌ و ڕێزگرتن لە پێکەوەژیانی ئایین و بیروڕا جیاوازەکان و برەودان به‌ بنه‌ماکانی به‌های پێکه‌وه‌ژیانی ئاینه‌كان و که‌مایه‌تییه‌كان له‌ ستراتیژ و پێشه‌نگییه‌کانی حکومه‌تی هه‌رێمن.
 هه‌روه‌ها ئاماژه‌یان به‌وه‌دا که‌ هەرێمی کوردستان بووەتە ئارامترین شوێن لە عیراق بۆ ئایینە جیاوازەکان و ئەوانەی کە به‌مه‌ترسی تیرۆر و هەڕەشە ناوچەکانی خۆیان بەجێ دێڵن، ڕویان لە هه‌رێمی کوردستان کردووه‌.
هاوکات شاندی هه‌رێم پرسی ئێزه‌دیه‌کانی باسکرد و ڕایانگه‌یاند که‌ حه‌وت ساڵ به‌سه‌ر جینۆسایدی ئێزه‌دییه‌كان و که‌مایه‌تییه‌كانی تر تێده‌په‌ڕێت و تاکو ئێستا تاوانباران ڕاپێچی دادگا نه‌كراون.
لەلای خۆیەوە لۆرد تاریق احمد ستایشی هەڵوێستی حکومەتی هەرێم و  گەلی کوردستانی کرد لە پێشوازیکردن لە ئاوارە و پەنابەرەکان له‌ که‌مایه‌تی و ئاینی جیا، بە تایبەتیش ئەوانەی کە دووچاری ئەشکەنجە دەبنەوە لە ناوچەکانی خۆیان بەهۆی باوەڕە ئایینیەکانیان.
هاوکات ستایشی ڕۆڵی حکومەتی هەرێمی کوردستان کرد بۆ گرینگیدانی بە ئازادی ئایین و بیر و باوەڕ و هەموو ئەو هاریکارییەی کە پێشكەشی ئاوارە و پەنابەرەکان دەکات به‌تایبه‌تیش له‌سه‌ر پرسی ئێزه‌دییه‌کان لۆرد ئه‌حمه‌د ڕایگه‌یاند که‌ پشتیوانی ته‌واوی یاسای ڕزگاربوانی ئێزه‌دیه‌کانن.
لۆرد ئه‌حمه‌د دووجار سه‌ردانی هه‌رێمی کوردستانی کردووه‌ و له‌نزیکه‌وه‌ دۆخەکەی بینیوە و ستایش و پێزانینی بۆ ڕۆڵی هه‌رێم ده‌ربڕیوه‌.

لەندەن
٦ ی ته‌مووزی ٢٠٢٢