نوێنەری حکومەتی هەرێمی کوردستان پێشوازی لە تونجەر بەکرخان هاوسەرۆکی دەم پارتی دەکات

نووسینگەی نوێنەرایەتی، لەندەن، www.uk.gov.krd. کاروان جمال تاهیر نوێنەری حکومەتی هەرێمی کوردستان پێشوازییکرد لە تونجەر بەکرخان هاوسەرۆکی دەم پارتی کرد.

لە دیدارەکەدا گفتوگۆ دەربارەی پرۆسەی ئاشتی و گرینگی هەنگاوەکانی کرا بەمەبەستی کۆتایی هێنان بە شەڕ و توند و تیژی و چارەسەرکردنی ئاشتییانه‌ێ پرسی کورد لە تورکیا کرا.

هاوسەرۆکی دەم پارتی جەختی لەسەر گرینگی ئەو قۆناخەی ئێستا کردەوە بۆ ئەوەی هەردوولا سوود لەو دەرفەتە گرینگە وەربگرن و بە یەکجارەکی کۆتا بە جیاوازی و گرفته‌کان بهێندرێت، کە ئەوەش خواستی گەلی کوردە لە تورکیا بەمەبەستی دەستپێکردنی قۆناخێکی تازە کە ئەمن و  ئاسایش و برایەتی و پێکەوە ژیان له‌ ووڵاتدا بهێنێته‌ کایه‌وه‌.

نوێنەری حکومەتی هەرێمی کوردستان وێڕای پێشوازی گه‌رم، خۆشحاڵی دەربری و تیشكی خستە سەر هەوڵە بەردەوامەکانی سەرکردایەتی سیاسی کوردستان و پشتگیریکردنی لە گرتنەبەری رێگای ئاشتی و ووتوێژ بۆ دۆزینه‌وه‌ی چارەسەری برایانه‌ بۆ دۆزی کورد لە تورکیا و لەو رووەشەوە نوێنه‌ری حکومه‌تی هه‌رێم ڕایگه‌یاند که‌ سەرکردایەتی سیاسی هه‌رێمی کوردستان هەموو هاوکاری و هەماهەنگیەکی کردووە بۆ سەرخستنی ئەو پرۆسە گرینگە مێژووییە.

هەردوولا هاورابوون لەسەر پێویستی بەکارهێنانی هەموو ئامرازەکانی بەردەست بۆ ئەوەی ئەو پرۆسەیە سەربکەوێت، کە لەدەرئەنجامدا ئاشتی و سەقامگیری لە ناوچەکە پتەوتر دەکات و بەیەکەوە ژیانی ئاشتیانە و برایەتی نێوان گەلانی ناوچەکە و جیهان بە گشتی بەهێزتر دەکات. لەو سۆنگۆیەشەوە بیرو ڕاکان ئاڵ و گۆڕکران.

نووسینگەی نوێنەرایەتی-لەندەن
٢٧ی حوزەیرانی ٢٠٢٥