نوێنەری حکومەتی هەرێمی کوردستان پێشوازی لە دەستەی ڕێکخراوی ڕۆشەنبیرانی کورد لە بەریتانیا دەکات

کاروان جمال تاهیر نوێنەری حکومەتی هەرێمی کوردستان لە بەریتانیا پێشوازی لە کۆڤە احمد سکرتێری گشتی ڕێکخراوی ڕۆشەنبیرانی کورد لە بەریتانیا و دەستەی بەڕێوەبردنی ڕێکخراوەکە کرد.

سەرۆکی ڕێکخراوەکە سەرەتا سوپاسی نوێنەرایەتی حکومەتی هەرێمی کوردستانی کرد لە بەریتانیا و پوختەیەکی دەربارەی کارو چالاکیەکانی ڕێکخراوی ناوبراوی پێشکەش کرد و تیشكی خستە سەر پلان و بەرنامەی داهاتووی ڕێکخراوەکە بەمەبەستی کۆکردنەوە و خزمەتکردنی ڕەوەندی کوردستانی.

هەر لە دیدارەکەدا گفتوگۆ دەربارەی چۆنیەتی چالاکتر کردنی ڕەوەندی کوردستانی و کارکردن لەسەر بەهێزترکردنی کەلتور و نەریتە کوردەوارییەکان لە بەریتانیا کرا ، هەروەها جەخت لەسەر هەماهەنگی بەردەوامی نێوان نوێنەرایەتی حکومەتی هەرێم و ڕەوەندی کوردستانی کرایەوە.

نوێنەری حکومەتی هەرێمی کوردستان لە لای خۆیەوە باسی کاری ڕێکخراوه‌یی و گرینگی دامه‌زراندنی کۆمه‌ڵه‌و ڕێکخراوی کوردستانی و فه‌رهه‌نگی و که‌لتووری کرد و ڕایگه‌یاند که‌ کۆمه‌ڵه‌و ڕێکخراوه‌کان هۆکارێکی  سه‌ره‌کی ده‌بن بۆ گه‌شه‌پێدانی په‌یوه‌ندی کۆمه‌ڵایه‌تی و لێکنزیکبوونه‌وه‌ی کوردستانیان له‌لایه‌ک، هاوکات بۆ لۆبیکردن و ناساندنی که‌لتووری و فه‌رهه‌نگی کوردستانی و چالاکی ڕۆشه‌نبیری له‌لایه‌کی تر. هه‌ر له‌و سۆنگه‌یه‌شه‌وه‌ دەستخۆشی لە ڕێکخراوی ناوبراو کرد و جەختی لەسەر ئامادەباشی نوێنەرایەتی حکومەتی هەرێمی کوردستان کردەوە بۆ پێشكەشکردنی هەر جۆرە هاریکارییەك بەمەبەستی سەرخستنی بەرنامەکانی ڕێکخراوە کوردییەکان و خزمەتکردنی ڕەوەندی کوردستانی لە بەریتانیا.

شایانی باسە نوێنەرایەتی حکومەتی هەرێمی کوردستان لە هەماهەنگی بەردەوام دایە لەگەڵ ڕێکخراو و دامەزراوە کوردییەکان بەمەبەستی بره‌ودانی زیاتر به‌ په‌یوه‌ندییه‌کان له‌گه‌ڵ ڕەوەندی کوردستانی و بەهێزکردنی پێگە و دەنگی کۆمەڵگای کوردستانی لە بەریتانیا.

لە دیدارەکەدا خەسرۆ ئاژگەیی بەڕێوەبەری کاروباری سیاسی و میدیا و هاوڕێ واحید بەڕێوەبەری بازرگانی و وەبەرهێنان ئامادە بوون.