نوێنەرایەتی حکومەتی هەرێم ڤیدیۆ کۆنفرانسێك بۆ گرووپی APPG لەگەڵ دکتۆر دلاوەر عەلائەدین ساز دەکات

گرووپی دۆستایەتی کوردستان لە پەرلەمانی  بەریتانیا وەك نەریتی ساڵانە شاندێکیان سەردانی هەرێمی کوردستان دەکات  و دیدار لەگەڵ کاربەدەستانی پەرلەمان و حکومەتی هەرێمی کوردستان و ڕێکخراوە ناحکومیەکان ساز دەکات بەمەبەستی بەدواداچوون بە دوایین پێشهات و ڕووداوەکان لە هەرێم و عیراق و ناوچەکە. بڵاوبوونەوەی پەتای کۆڕۆنا ئەمساڵ وایکرد کەوا گرووپەکە نەتوانن ئەم سەردانە ئەنجام بدەن، بەڵام هاوکات دۆخی ئێستای جیهان بە هۆی نەخۆشی کۆڕۆناوە ڕێگر نەبوو لەبەردەم هەوڵەکانی ئەو گرووپە لە کۆکردنەوەی پشتگیری و پاڵپشتی بۆ هەرێمی کوردستان و هەوڵەکانیان بۆ بەدواداچوون بە بارودۆخی هەرێم، بۆ ئەم مەبەستەش گرووپەکە لە ڕێگای ڤیدیۆ کۆنفڕانسەوە سەردانی هەرێمی کوردستان دەکەن و دیدار لەگەڵ لایەنە پەیوەندیدارەکان ئەنجام دەدەن. لەو سۆنگۆیەشەوە گرووپی ناوبراو یەکەمین سەردانیان لە ڕێگای ڤیدیۆ کۆنفڕانسەوە بۆ لای دکتۆر دلاوەر عەلائەدین سەرۆکی ئەنیستیتۆی مێری سازکرد کە تیایدا کاروان جمال تاهیر نوێنەری حکومەتی هەرێم لە بەریتانیا و ڕۆبەڕت هاڵفن سەرۆکی گرووپی APPG و ئەلیسیا کێڕنس ئەندامی گرووپەکە و گاری کێنت سکرتێری گرووپەکە بەشداربوون.

لەو ڤیدیۆ کۆنفڕانسەدا بە تێر و تەسەل باس لە بارودۆخی کوردستان و دوایین پێشهات و ڕووداوەکانی هەرێم و عیراق و ناوچەکە کرا و تیشك خرایە سەر دوایین پەرەسەندنەکانی پەیوەندیەکانی نێوان هەولێر و بەغدا و گفتووگۆکان بۆ چاره‌سه‌ری گرفته‌کان، هەڕەشەکانی داعش و ئەو تەحەدیاتانەی کە ڕووبەڕووی  هەرێم دەبنەوە لەم کات و ساتەدا. لە هەمانکاتدا باس لە پەیوەندیە مێژووییەکانی نێوان هەرێم و  بەریتانیا کرا و جەخت لەسەر گرینگی ئەو پەیوەندیانە و ڕۆڵی کاریگەری بەریتانیا لە ناوچەکە کرایەوە. هاوکات گفتوگۆ لەسەر دەرفەتەکانی برەودان بە پەیوەندیەکانی نێوان هه‌ڕدوولا کرایەوە.

گرووپی APPG جەختی لەسەر بەردەوامیدانی گرووپەکەی کردەوە لە کارکردن بۆ وەدەستهێنانی پشتگیری زیاتری بەریتانیا بۆ هەرێمی کوردستان.

گرووپی ناوبراو لە چەند ڕۆژی داهاتوودا بەردەوام دەبێت لە ڕێکخستنی ڤیدیۆ  کۆنفڕانس لەگەڵ کاربەدەستانی پەرلەمان و حکومەتی هەرێمی کوردستان

شایانی باسە خەسرۆ ئاژگەیی بەڕیوەبەری کاروباری سیاسی و میدیا ئامادەی دیدارەکە بوو.