نوێنەرایەتی حکومەتی هەرێم و گرووپی دۆستایەتی کوردستان لە پەرلەمانی بەریتانیا یادەوەری ٣٠ ساڵەی دامه‌زراندنی نوای ئارام بەرز ڕادەگرن

نوێنەرایەتی حکومەتی هەرێمی کوردستان لە بەریتانیا و گرووپی پەرلەمانتارانی هەموو پارتەکانی بەریتانیا بۆ پشتگیریکردن لە هەرێمی کوردستان APPG بە بۆنەی تێپەڕبوونی ٣٠ ساڵ بەسەر ڕاپەڕینە مەزنەکەی بەهاری ساڵی ١٩٩١ و دەستپێشخەرییە مێژووییەکەی سێر جۆن مەیجەر بۆ دروستکردنی نوای ئارام و دژە فڕین لە هەرێمی کوردستان کە بووە هۆکاری پاراستنی گەلی کوردستان لە جینۆسایدی زیاتر و دامەزراندنی قەوارە و دامەزراوەکانی هەرێم، وێبینارێك سازدەکەن بۆ بەرزڕاگرتنی ئەو یادە مێژووییە له‌ ڕۆژی پێنج شه‌ممه‌ ڕێکه‌وتی ٨ نیسان ٢٠٢١ کاتژمێر ١٠:٣٠ بۆ ١١:٣٠ سه‌ر له‌به‌یانی به‌کاتی به‌ریتانیا و ١٢:٣٠ به‌کاتی کوردستان.

لەو بۆنەیەدا بەڕێزان (سێر جۆن مەیجەر) سەرۆك وەزیرانی پێشووتری بەریتانیا، مەسرور بارزانی سەرۆك وەزیرانی هەرێمی کوردستان، ڕۆبەڕت هاڵفن سەرۆکی گرووپی APPG و نازم زەهاوی وەزیری کار و پیشەسازی و وەزیری دابەشکردنی ڤاکسینی کۆڕۆنا بەشداری دەکەن و ووتار پێشکەش دەکەن.

هەر لە بۆنەکەدا، سەفین دزەیی بەرپرسی فەرمانگەی پەیوەندیەکانی دەرەوەی حکومەتی هەرێم، کاروان جمال تاهیر نوێنەری حکومەتی هەرێم لە بەریتانیا، پەرلەمانتاران جەیسن مەکارتنی و ئەلیسیا کێڕنس، جەیمس سۆڕنتن کونسوڵی گشتی بەریتانیا لە هەرێمی کوردستان و کاپتن تۆم هاردی فۆرسیث  کاربەدەستی باڵای پێشوو لە کابینەی حکومەتی بەریتانیا و گاری کێنت سکرتێری گرووپی دۆستایەتی کوردستان لە پەرلەمانی بەریتانیا قسە دەکەن.

بۆ بەشداریکردن لەو بۆنەیە تکایە ناوی خۆتان لە ڕێگای ئەو لینکەوە تۆمار بکەن.