شاندێکی حکومەتی هەرێمی کوردستان بەشداری لە کۆڕبەندی جیهانی پەروەردە دەکات

نوێنه‌ری حکومه‌تی هه‌رێمی کوردستان له‌ به‌ریتانیا هاوڕێیه‌تی شاندێکی باڵای حکومەتی هەرێمی کوردستان کرد کە پێکهاتبوو لە به‌ڕێزان ئالان حمە سەعید وەزیری پەروەردە و به‌ڕێز د.ئارام محمد قادر وەزیری خوێندنی باڵا و توێژینەوەی زانستی و شاندی یاوه‌ریان بۆ بەشداریکردن له‌ گه‌وره‌ترین کۆڕبەندی جیهانی پەروەردەیی که‌ له‌ له‌نده‌نی پایته‌ختی شانشینی یه‌کگرتوو به‌ڕێوه‌ده‌چێت ساڵانه‌.
کۆڕبه‌نده‌که‌ گەورەترین گردبوونەوەی نێوده‌وڵه‌تییه‌ که‌ ژماره‌یه‌کی زۆر ووڵاتان به‌شداری تێدا ده‌که‌ن له‌سه‌ر ئاستی وه‌زیر و زۆربه‌ی ناوه‌ند و دامه‌زراوه‌ په‌روه‌رده‌ییه‌کانی که‌رتی گشتی و تایبه‌ت و شاره‌زایانی بواری په‌روه‌رده‌ به‌شداری ده‌که‌ن.
لە کۆڕبەندەکەدا که‌ زیاتر له‌ ١٢٠ ووڵات تێدا به‌شداربوون، له‌چوارچێوه‌ی په‌ناڵی جیاجیادا تیشک خرایه‌ سه‌ر ئه‌زموون و سیاسه‌تی په‌روه‌رده‌ و ئاسته‌نگی گرفته‌کانی به‌رده‌م په‌روه‌رده‌و خوێندنی باش، هاوکات گفتووگۆو ئاڵوگۆڕی بیروڕاکان کران سه‌باره‌ت به‌ چۆنێتی پێشخستنی ئاستی په‌روه‌ره‌ و ڕۆڵی ته‌کنه‌لۆجیا له‌به‌ره‌وپێشبردنی په‌روه‌رده‌ی باش.
هه‌ر له‌ کۆڕبه‌نده‌که‌دا به‌ڕێز گاڤین ویلیامسن وەزیری پەروەردەی بەریتانیا لە ووتارێکیدا تیشکی خستە سەر ڕوئیاکان سەبارەت بە بواری پەروەردە لە دەرەوەی بەریتانیا. ووتیشی: ” بەریتانیا هەموو کاتێك ڕوو لە جیهانی دەرەوە بووە و شانازی بە مێژووی خۆی دەکات کاتێك باس لە بوارەکانی پەروەردە و پیشەیی دەکرێت. دەرگاکانی بەریتانیا هەموو کاتێك کراوەن بۆ قوتابیانی جیهان ئەوانەی دەیانەوێت سوود لە پەروەردە پێشەنگەکەمان وەربگرن. ئەو ئامانجە لە مانگی ئەیلولی ساڵی ٢٠١٩ هاته‌دی ئەویش بە دروستکردنی سیستەمێکی نوێی تایبەت بە ڤیزە و مانەوە لە بەریتانیا کە تیایدا ئه‌و خوێندکاره‌ نێوده‌وڵه‌تییانه‌ی خوێندن له‌ به‌ریتانیا ته‌واو ده‌که‌ن مافی مانەوەی دوو ساڵیان پێدەدرێت لە دوای تەواوبوونی خوێندنیان بەمەبەستی گەڕان بە دوای هەلی کار.” هاوکات ڕایگه‌یاند ئاڵوگۆڕی ئه‌زموون زۆرگرینگه‌و ئێمه‌ زۆر سودمان له‌ ووڵاتانی تر وه‌رگرتووه‌.
لەپه‌راوێزی ئاماده‌بوون له‌ بۆنه‌ پێشوازی کۆڕبه‌نده‌که‌ که‌ له‌ لانکاسته‌ر هاوس ڕێکخرابوو بۆ شانده‌کانی به‌شداربوو، شاندی حکومه‌تی هه‌رێم چاویان کەوت بە گاڤین ویلیامسن وەزیری پەروەردەی بەریتانیا و لە گفتووگۆیه‌کدا سوپاس و پێزانینی حکومەتی هەرێمی کوردستانیان گەیاندە وەزیری په‌روه‌رده‌ی به‌ریتانیا و بانگهێشتنامه‌یه‌کی کراوه‌یان ئاراسته‌ی به‌ڕێزیان کرد، له‌به‌رامبه‌ردا، به‌ڕێز ویلیامسن خۆشحاڵی ده‌ربڕی به‌دیداری له‌گه‌ڵ شاندی هه‌رێمی کوردستان و ستایشی ڕۆڵی هه‌رێمی کوردستانی کرد و به‌هاوبه‌شێکی گرینگی وه‌سفکرد و جەختی لەسەر هەماهەنگی زیاتر کرده‌وه‌ و سوپاسی بانگهێشتنامه‌که‌ی کرد و به‌ڵێنی دا که‌ ده‌یخاته‌ به‌رنامه‌ی سه‌ردانه‌کانییه‌وه‌.
هه‌ر له‌ په‌راوێزی کۆڕبەندەکەدا شاندی حکومەتی هەرێمی کوردستان ژمارەیەك دیدار و چاوپێکەوتنیان لەگەڵ ناوه‌ندو دامەزراوە و کۆمپانیا په‌روه‌رده‌ییه‌کان ئه‌نجامدا له‌سه‌ر ئاسته‌ جیاکان و بەمەبەستی دۆزینه‌وه‌ی ئه‌و ده‌رفه‌تانه‌ی که‌ هاوکارده‌بن له‌ پێشخستنی سیستمی په‌روه‌رده‌یی له‌ هه‌رێمی کوردستان.
هاوکات شاندی حکومه‌تی هه‌رێم ئاماده‌ی پیشانگای تایبه‌تی نمایشکردنی ته‌کنه‌لۆجیا تایبه‌ته‌کانی بواری په‌روه‌رده‌یی بوون له‌ پێشانگای Education Show and Bett.
شایانی باسه‌ له‌ وه‌زاره‌تی خوێندنی باڵاو توێزینه‌وه‌ی زانستی به‌ڕێزان د.خه‌تاب ب.گ دیوان، د.داود ئه‌تروشی ب.گ پرۆژه‌کان و د.ئامانج ڕاوێژکاری وه‌زاره‌ت یاوه‌ری وه‌زیری خوێندی باڵابوون و به‌ڕێزان مامۆستا دڵشاد ب.گ په‌روه‌رده‌ی سلێمانی، کاک مه‌ریوان به‌گۆک ب.گ دیوان و کاک به‌شدار به‌ڕێوه‌به‌ری پلاندانان یاوه‌ری وه‌زیری په‌روه‌رده‌ بوون.
١٩ بۆ ٢٣ کانوونی دووه‌می ٢٠٢٠
له‌نده‌ن