شاندێکی پەرلەمانی کوردستان سەردانی بەریتانیا دەکەن

لە میانەی سەردانێکی شاندێکی پەرلەمانی کوردستان بۆ ووڵاتی بەریتانیا کە پێکهاتبوو لە بەڕێزان لوقمان حمد حاجی مصطفی سەرۆکی لیژنه‌ی شارەوانی، گواستنەوە و گەیاندن و گەشت و گوزار و مام بورهان قانع ئەندامی لیژنه‌ی ڕۆشەنبیری و کۆمەڵگه‌ی مەدەنی لە پەرلەمانی کوردستان ژمارەیەك دیدار و کۆبوونەوەیان سازدا.

شاندەکە بە یاوەری کاروان جمال تاهیر نوێنەری حکومەتی هەرێمی کوردستان سەردانی شارەوانی لامبێسیان لە لەندەن کرد و دیدارێکیان لەگەڵ ابراهیم دۆگەز شارەداری لامبێس کە بە ڕەگەز کوردی باکوری کوردستانە ئەنجامدا.

له‌ دیداره‌که‌دا شارەداری لامبێس کورتەیەکی لەسەر سیستەمی کارکردنی شارەوانی لامبێس پێشکەش کرد، وە تیشکی خستە سەر جۆری هه‌ماهه‌نگی شاره‌وانه‌یه‌کان وه‌ک حکومه‌تی خۆجێی له‌گه‌ڵ حکومه‌تی ناوه‌ندی به‌ریتانیا و ئه‌و ده‌سه‌ڵاتانه‌ی که‌ گواستراونه‌ته‌وه‌ بۆ شاره‌وانییه‌كان به‌تایبه‌تی له‌ بواری بودجه‌ی ناوه‌ندی و ده‌سه‌ڵاتی شاره‌وانییه‌کان بۆ به‌ده‌ستهێنانی داهات و به‌کارهێنانیان.

دواتر شاندی پەرلەمانی کوردستان کورتەیەکیان لەسەر شێوازی کارکردنی شارەوانیەکانی کوردستان پێشکەش کرد و تیشکیان خستە سەر هەنگاوەکانی تایبەت بە باشترکردنی کارەکانی ئەو شارەوانیانە.

هەر لە دیدارەکەدا گفتوگۆ دەربارەی چۆنیەتی سوود وەرگرتن لە ئه‌زموونی شارەوانی لامبێس کرا بەمەبەستی برەو دان بە کارەکانی شارەوانیەکانی هه‌رێمی کوردستان.

هەر لە درێژەی سەردانەکەیاندا، شاندی پەرلەمانی کوردستان بە یاوەری نوێنەری حکومەتی هەرێمی کوردستان دیدارێکیان لەگەڵ پەرلەمانتار ڕۆبەڕت هاڵفن سەرۆکی گرووپی دۆستایەتی کوردستان لە پەرلەمانی بەریتانیا و گاری کێنت سکرتێری گرووپەکە سازکرد.

لە دیدارەکەدا هه‌ردوولا بیروڕایان ئاڵووگۆڕکرد له‌سه‌ر ژیانی په‌رله‌مانی و پێکهاتەی هەردوو پەرلەمانی کوردستان و بەریتانیا و کاری لیژنه‌کان و کاریگه‌ریان له‌سه‌ر حکومه‌ت و هاووڵاتیان. شاندی پەرلەمانی کوردستان سوپاسی هەوڵەکانی گرووپی ناوبراویان کرد بۆ کارکردنیان لەسەر بەهێزترکردنی پەیوەندیەکانی نێوان بەریتانیا و هەرێمی کوردستان. هاوکات جەختیان لەسەر گرینگی بەردەوامی هەماهەنگیەکانی نێوان پەرلەمانی کوردستان و گرووپی ناوبراو کرد بەمەبەستی سوود وەرگرتن لە ئه‌زموونی پەرلەمانی بەریتانیا بەمەبەستی بەرەوپێشبردنی سیستەمی پەرلەمانیی لە کوردستان.

ڕۆبەڕت هاڵفن لە لای خۆیەوە ووتی: “من کوردستانم زۆر خۆش دەوێت و پشتگیری لە مافە ڕەواکانی گەلی کوردستان دەکەم. گرووپەکەمان بەردەوام دەبێت لە کۆکردنەوەی پشتگیری بۆ هەرێمی کوردستان و بەهێزترکردنی پەیوەندیە دوو قۆڵیەکانی نێوان هەرێم و بەریتانیا.”

هەر لە درێژەی سەردانەکەیاندا شاندی پەرلەمانی کوردستان چاویان کەوت بە ڕۆژنامەنووسی ناوداری پێشووی (بی بی سی) پڕۆفیسۆر باڕنی جۆنس. ناوبراو باسی لە چۆنیەتی بەرەو پێشبردنی کاری میدیایی کرد له‌ ووڵاتە تازە پێگەیشتووەکان. جەختیشی لەسەر ئەوە کردەوە کەوا بوونی میدیایەکی باوەڕپێکراو لە لایەن خەڵکەوە، پێگەی حکومەت و سیاسه‌تکاران و ووڵاتەکە بەهێزتر دەکات. هاوکات ئامادەباشی خۆی بۆ هەر جۆرە هاوکارییەك بەمەبەستی بەرەوپێشبردن و بە پیشه‌یی کردنی زیاتری میدیای کوردستان دووپات کردەوە.

ڕۆژنامەنووس باڕنی جۆنس بۆ ماوەی ٣٠ ساڵ وەك پەیامنێری دامەزراوەی (بی بی سی) لە پەرلەمانی بەریتانیا کاری کردووە و خاوەنی ژمارەیەك پڕۆگرامی ناوداری بەریتانیا بووە، ئێستاش وەك ڕاوێژکار و مامۆستا لە ژمارەیەك ووڵاتانی جیهان ڕاهێنان بە ڕۆژنامەنووسان و دامەزراوە میدیاییەکانی کار دەکات.

شایانی باسە خەسرۆ ئاژگەیی بەڕێوەبەری کاروباری سیاسی و میدیا لە نوێنەرایەتی ئامادەی دیدارەکان بوو.