نوێنەری حکومەتی هەرێمی کوردستان بەشداری لە کۆنفڕانسی ساڵانەی پارتی کاری بەریتانیا دەکات

شاندێکی نوێنەرایەتی حکومەتی هەرێمی کوردستان بە سەرۆکایەتی کاروان جمال تاهیر نوێنەری حکومەتی هەرێم لە بەریتانیا بەشداری لە کۆنفڕانسی ساڵانەی پارتی کاری بەریتانیا کرد کە لە شاری بڕایتن بەڕێوەچوو.

لە میانەی کۆنفڕانسەکەدا، نوێنەری حکومەتی هەرێم ژمارەیەك دیداری لەگەڵ پەرلەمانتاران و لۆردەکان و ئەندامانی پارتەکە و دیپلۆماتکارانی جیهانی سازدا کە تیایدا باس لە دوایین پێشهاتەکانی سەر گۆڕەپانی سیاسی کوردستان، عیراق و ناوچەکە کرا و تیشك خرایە سەر دوایین پەرەسەندنەکانی پڕۆسەی سیاسی لە عیراق و هەرێمی کوردستان. هاوکات شاندی نوێنەرایەتی بەشداریان کرد لە ژمارەیەك کۆڕ و کۆبوونەوە سەبارەت بە سیاسەتی ناوەخۆیی پارتەکە و ڕووداو و پەرەسەندنە جیهانیەکان.

هەر لە پەراوێزی کۆنفڕانسەکەدا نوێنەرایەتی حکومەتی هەرێمی کوردستان لە بەریتانیا بۆنەیەکی پێشوازی ڕێکخست بە مێوانداری نوێنەری حکومەتی هەرێم و وەین دەیڤد وەزیری حکومەتی سێبەر بۆ کاروباری ڕۆژهەڵاتی ناوەڕاست و باکوری ئەفریقیا. لە بۆنەکەدا کە بۆ یەکەمین جارە نوێنەرایەتی حکومەتی هەرێم لە بەریتانیا لە کۆنفڕانسی پارتی کار ڕێکی دەخات، ژمارەیەکی بەرچاوی پەرلەمانتار، لۆرد، کاربەدەستان و ئەندامانی پارتەکە و دیپلۆماتکارانی جیهانی و ژمارەیەك لەو کوردانەی کە ئەندامی ئەنجومەنی شارەوانی و ئەندامی پارتەکەن ئامادە بوون، سەرەتا کاروان جمال تاهیر نوێنەری حکومەتی هەرێم لە بەریتانیا سوپاسی پشتگیری بەردەوامی پارتی کاری بەریتانیای لە هەرێمی کوردستان و پرسە کوردستانیەکان کرد و دۆستایەتی نێوان هەرێمی کوردستان و پارتی کاری بە گرینگ وەسفکرد، جەختیشی لەسەر ئەوە کردەوە کەوا هەرێمی کوردستان چاوەڕێی پشتگیری و پاڵپشتی زیاتری پارتی کارە و دڵخۆشە بە پەیوەندیە دێرین و بەهێزەکەی لەگەڵ ئەو پارتە. لەلای خۆیەوە وەین دەیڤد وەزیری حکومەتی سێبەر بۆ کاروباری ڕۆژهەڵاتی ناوەڕاست و باکوری ئەفریقیا خۆشحاڵی خۆی بە بەشداریکردن لەو بۆنە تایبەتە دەربڕی و ئەوەی دووپات کردەوە کەوا هەرێمی کوردستان هاوپەیمانێکی گرینگە و پارتەکەی بەردەوام دەبێت لە پشتگیریکردن لە هەرێمی کوردستان و بەهێزترکردنی پەیوەندیەکانی پارتەکەی لەگەڵ هەرێمی کوردستان. وەین دەیڤد هەروەها باسی لە سەردانە سەرکەوتووەکەی به‌ڕێز نێچیرڤان بارزانی سەرۆکی هەرێمی کوردستان بۆ بەریتانیا کرد و خۆشحاڵی خۆی بە دیدار لەگەڵ بەڕێزیان دووپات کردەوە. جەختیشی لەسەر ئەوە کردەوە کە لەگەڵ گرووپی دۆستایەتی کوردستان لە پەرلەمانی بەریتانیا لە نزیکترین دەرفەتدا سەردانی هەرێمی کوردستان دەکات بۆ ئەوەی لە نزیکەوە بارودۆخ و پێشکەوتنەکانی هەرێم ببینێت و کار لەسەر کۆکردنەوەی پشتگیری زیاتر لە بەریتانیا بۆ هەرێمی کوردستان بکات.

هەر لە پەراوێزی کۆنفڕانسەکەدا، نوێنەری حکومەتی هەرێمی کوردستان لە بەریتانیا بەشداری لە بۆنەیەکی تایبەت بە سەرۆکی نێردە دیبلۆماسیەکانی جیهانی کرد کە باڵیۆز و سەرۆکی نێردە دیبلۆماسیەکان تێیدا بەشدار بوون. ئەو بۆنەیە دەرفەتێکی گرینگ بوو بۆ دیدار لەگەڵ ئەو دیبلۆماتکارانە و گفتوگۆکردن لەسەر چۆنیەتی بەهێزترکردنی پەیوەندیەکانی نێوان هەرێمی کوردستان و ووڵاتەکان.

لە دوا ڕۆژی کۆنفڕانسەکەشدا شاندی نوێنەرایەتی لە شوێنی دیاریکراو بۆ دیبلۆماتکارە جیهانیەکان ئامادەی ووتاری کیەر ستارمەر سەرۆکی پارتی کار بوون کە تێیدا هێڵە گشتییه‌کانی سیاسەتی ناوەخۆ و دەرەوەی پارتەکەی باسکرد بۆ ساڵی داهاتوو، وە باسی لە پلانەکانی پارتەکەی کرد بۆ چۆنیەتی ڕووبەڕووبوونەوەی تەنگژە ناوخۆییه‌کان و ئامادەسازی بۆ هەڵبژرادنی داهاتووی بەریتانیا کە چاوەڕوان دەکرێت لە ساڵی ٢٠٢٣ ئەنجام بدرێت.

 نوێنەرایەتی حکومەتی هەرێمی کوردستان ساڵانە بەشداری لە کۆنفڕانسی  هەردوو پارتی سەرەکی بەریتانیا (پارێزگاران و کار) دەکات کە دەرفەتێکی باشە بەمەبەستی دیدار لەگەڵ داڕێژەرانی سیاسەتی هەردوو حیزبەکە و فراوانترکردنی پەیوەندیەکانی نێوان هەرێمی کوردستان و هەردوو پارتی ناوبراو.  

شایانی باسە خەسرۆ ئاژگەیی بەڕێوەبەری کاروباری سیاسی و میدیا و هاوڕێ کاوانی بەڕێوەبەری بازرگانی و وەبەرهێنان لە نوێنەرایەتی حکومەتی هەرێم لە بەریتانیا یاوەری نوێنەری حکومەتی هەرێم بوون لە کۆنفڕانسەکەدا.