سێ وەزیری حکومەتی بەریتانیا بەشداری لە بۆنەیەکی پێشوازی نوێنەرایەتی حکومەتی هەرێم لە بەریتانیا دەکەن.

شاندێکی نوێنەرایەتی حکومەتی هەرێمی کوردستان بە سەرۆکایەتی کاروان جمال تاهیر نوێنەری حکومەتی هەرێم لە بەریتانیا بەشداری لە کۆنفڕانسی ساڵانەی پارتی پارێزگارانی بەریتانیا کرد کە لە شاری مانچستەر لە ماوه‌ی نێوان ٣-٦ی تشرینی یەکەم بەڕێوەچوو.

لە میانەی کۆنفڕانسەکەدا، نوێنەری حکومەتی هەرێم ژمارەیەك دیداری لەگەڵ کاربەدەستانی حکومەت، پەرلەمانتاران، لۆردەکان، ئەندامانی پارتەکە و دیپلۆماتکارانی جیهانی سازدا کە تیایدا باس لە دوایین پێشهاتەکانی سەر گۆڕەپانی سیاسی کوردستان، عیراق و ناوچەکە کرا. هاوکات تیشك خرایە سەر پەیوەندیە دوو قۆڵیە پێشکەوتووەکانی نێوان هەرێمی کوردستان و بەریتانیا و جەخت لەسەر گەشەدان بەو پەیوەندیانە لە هەموو ڕوێکەوە کرایەوە.

شاندی نوێنەرایەتی حکومەتی هەرێم هاوکات بەشداریکرد لە ژمارەیەك کۆڕ و سیمینار کە لەلایەن وەزیر و کاربەدەستانی حکومەت و پارتی پارێزگارانی بەریتانیا سازکران و تێیدا باس لە هێڵە گشتییه‌کانی سیاسەتی ئەو پارتە و حکومەت لە ماوەی ئەمساڵەی داهاتوودا کرا. هەر لە درێژەی کۆنفڕانسەکەدا، کاروان جمال تاهیر نوێنەری حکومەتی هەرێمی کوردستان لە بەریتانیا به‌شداری بۆنه‌ پێشوازی تایبەت بە باڵێۆز و سه‌رۆکی نێردە دیبلۆماسیە جیهانیەکان لە بەریتانیا کرا. ئەو بۆنەیە هەلێکی باش بوو بۆ دیدار لەگەڵ باڵیۆز و کۆمیشینەر و سەرۆکی نێردە دیبلۆماسیەکان و دیپلۆماتکارانی جیهان و گفتوگۆکردن لەسەر ڕووداو و پێشهاتەکان و خاڵە هاوبەشەکانی نێوان هەرێم و ئەو ووڵاتانە و چۆنیەتی بەهێزکردنی پەیوەندیە دوو قۆڵیەکان.

هەر لە پەراوێزی کۆنفرانسەکەدا، نوێنەرایەتی حکومەتی هەرێمی کوردستان لە بەریتانیا بۆنە پێشوازییەکی سازکرد له‌ ژێر ناوی دۆستایه‌تی هه‌رێمی کوردستان و پارتی پارێزگاران، که‌ هه‌ریه‌ک له‌ به‌ڕێزان جەیمس هیپی وەزیری هێزە چەکدارەکانی و  نازم زەهاوی وەزیری پەروەردە و جەیمس کلێڤەرلی وەزیری کاروباری ڕۆژهەڵاتی ناوەڕاست و باکوری ئەفریقیا و ژمارەیەك لە کاربەدەستانی پارتی پارێزگاران و حکومەتی بەریتانیا به‌شدار بوون، هاوکات ژماره‌یه‌ك په‌رله‌مانتار و دیبلۆماتکاران و ئه‌ندامانی پارتی پارێزگاران  و دۆستانی گەلی کوردستان بەشداریان کرد. لەو بۆنەیەدا کە تەنها بۆنە بوو لە لایەن گه‌لێکی ڕۆژهەڵاتی ناوەڕاست لە کۆنفڕانسەکە ساز بکرێت، سەرەتا نوێنەری حکومەتی هەرێم خۆشحاڵی خۆی بە بەشداری هەرسێ وەزیرەکەی بەریتانیا و دۆستانی گەلی کورد دووپات کردەوە، ووتیشی:

“پەیوەندیەکانمان لەگەڵ بەریتانیا قوڵ و فراوان و مێژوویین، ئەو ووڵاتە لە چەندین کاتی سەختدا هاریکاری کوردستانی کردووە، بە تایبەتیش بڕیارە بوێرەکەی سێر جۆن مەیجەر سەرۆك وەزیرانی پێشووتری بەریتانیا کاتێك لەسەر پێشنیاری ئەو نوای ئارام و دژە فڕین لە کوردستان پێکهێندرا و گەلی کورد لە بە کۆمەڵکوژی ڕزگارکرا، کە لە دەرئەنجامیشدا دام و دەزگا دیموکراسیەکانی خۆمانمان دامەزراند و هەرێمی کوردستان بووە نموونەیەکی سەرکەوتووی دیموکراسی و مافی مرۆڤ لە تەواوی ناوچەکەدا. سوپاسی بەریتانیا دەکەین کە پاڵپشتمان بوو لە شەڕ لە دژی تیرۆر”

نوێنەری حکومەتی هەرێمی کوردستان سەردانە فەرمیەکەی نێچیرڤان بارزانی سەرۆکی حکومەتی هەرێمی کوردستانی بە سەرکەوتوو و دەرئەنجامی پەیوەندیە بەهێزەکانی نێوان هەرێم و بەریتانیا وەسفکرد. ئاماژەشی بەوەدا کە لە سەردانەکەدا گفتوگۆ لەگەڵ سەرۆک وەزیران و کاربەدەستانی حکومەتی بەریتانیا کرا دەربارەی پەیوەندیە بەهێزەکان لە هەموو ڕووەکانەوە و جەخت لەسەر دۆستایەتی و هاوبەشییەتی نێوان هەردوولا کرایەوە.

کاروان جمال تاهیر هەروەها ووتی:

“پەیوەندیەکانمان لە دۆستایەتی و هاوبەشیەتی سەرچاوە دەگرن. هەردوولامان به‌های هاوبه‌شمان هەیە کە پێویست دەکات بیانپارێزین. پاڵپشتیکردن لە سەقامگیری و گەشەپێدان و بەرەوپێشتربردنی هەرێمی کوردستان لە بەرژەوەندی هەردوولاماندایە. پەیوەندیەکانی هەرێم و بەریتانیا پێشکەوتوو و گرینگن، وە بوونی نازم زەهاوی وەك وەزیری پەروەردەی بەریتانیا باشترین بەڵگەیە لەسەر گرینگی ئەو پەیوەندیانە. سوپاسی پابەندبوونتان دەکەین بە پاڵپشتیکردن لە هەرێمی کوردستان بۆ زاڵ بوون بەسەر هەڕەشەکان کە ڕووبەڕووی هەموو لایەکمان دەبێتەوە.”

دواتر جەیمس هیپی وەزیری هێزە جەکدارەکانی بەریتانیا لە ووتەیەکیدا ووتی:

“بوونی سێ وەزیر لەو بۆنە پێشوازییەی نوێنەرایەتی حکومەتی هەرێم ڕەنگدانەوەی پەیوەندیە بەهێزەکانی نێوان هەرێمی کوردستانی عێراق و بەریتانیایە. دۆستی خۆشەویستمان زۆرن لە هەرێمی کوردستان. من و وەزیری کاروباری ڕۆژهەڵاتی ناوەڕاست لە مانگی کانونی یەکەمی پارساڵ سەردانێکی سەرکەوتوومان بۆ هەرێمی کوردستان ئەنجامدا. ئێمە شانازی بە پێشمەرگەوە دەکەین کە توانی ڕووبەڕووی دڕەندەترین گرووپ ببێتەو و شانازی بەوەش دەکەین کە کارتان لەگەڵ دەکەین و ڕاهێنان بەو پێشمەرگانە دەکەین بۆ ئەوەی ئامادە بن بۆ بەرپەرچدانەوەی هەر هەڕەشەیەك کە دێتە سەر هەرێم. “

دواتر نازم زەهاوی وەزیری پەروەردەی حکومەتی بەریتانیا ووتی:

“شانازییەکی زۆر بە سەردانەکەی نێچیرڤان بارزانی سەرۆکی هەرێمی کوردستان دەکەم کە زۆر گرینگ بوو بۆ سەرۆك وەزیرانیشمان کە پاڵپشتیکارێکی بەهێزی ئەو کوردستانەیە کە بووەتە سومبولی دیموکراسی لە ناوچەکە. بەردەوام دەبین لە پشتگیرکردن لە هەرێمی کوردستان و بەهێزترکردنی پەیوەندیە دووقۆڵیەکانی نێوانماندا. لەو زوانە وەزیری پەروەردەی هەرێمی کوردستان بە فەرمی داوەتی بەریتانیا دەکەم بۆ ئەوەی گفتوگۆ لەسەر چۆنیەتی بەرەوپێشبردنی بواری پەروەردە لە هەرێم بکەین و بۆ ئەوەی هەرێم بتوانێت سوود لە شارەزاییەکانمان لە بواری پەروەردە، بە تایبەتیش ئەو چاکسازیانەی کە ئەنجامان داون وەربگرن.”

لە کۆتاییشدا جەیمس کلێڤەرلی وەزیری کاروباری ڕۆژهەڵاتی ناوەڕاست و باکوری ئەفریقیا ووتی:

“بەهێزکردنی پەیوەندیەکانمان زۆر گرینگە. ئەگەر ئێمە بە پێکهێنانی نوای ئارام هاریکاریمان کردن، بەڵام ئێوەش هاریکارییەکی زۆر پێشکەش ئێمە دەکەن، لە هەمووشیان گرینگتر، ئەو دیاریە بەنرخەی کە پێشکەشی ئێمەتان کرد کە نازم زەهاویە کە ئێمەی لە نەخۆشی کۆڕۆنا پاراست و سەرکەوتوانە پڕۆسەی دابەشکردنی ڤاکسینی ئەنجامدا، وە ئێستاش پەروەردەی نەوە و سەرکردەکانی دواڕۆژمان دەکات. ئێوە دۆستی زۆر باشی ئێمەن و بە ناوی هەموو لایەك سوپاسێکی بێ پایانتان دەکەین نەوەك تەنها بۆ ئەو هەموو کارە باشەی کە لە هەرێم ئەنجامی دەدەن، بەڵکو بۆ ئەو هاریکاریە گرینگانەش کە پێشکەشی بەریتانیای دەکەن.”

لە کۆتا ڕۆژی کۆنفڕانسەکەشدا، شاندی نوێنەرایەتی ئامادەی ووتاری سەرۆکی پارتی پارێزگاران و حکومەتی بەریتانیا بۆریس جۆنسن بوون کە تیشکی خستە سەر سیاسەتی حکومەتەکی بۆ ساڵی داهاتوو  و گەشەدان بە توانا و شارەزاییەکانی بەریتانیا لە هەموو ڕوێکەوە بۆ ئەوەی پێگەی ئەو ووڵاتە لە جیهاندا وەك هێزێکی گرینگ و کاریگەر لە هەموو ڕووەکانەوە بمێنێتەوە.

شایانی باسە خەسرۆ ئاژگەیی بەڕێوەبەری کاروباری سیاسی و میدیا و هاوڕێ واحید بەڕێوەبەری بازرگانی و وەبەرهێنان لە نوێنەرایەتی حکومەتی هەرێمی کوردستان لە بەریتانیا یاوەری نوێنەری حکومەتی هەرێمی کوردستان بوون لە کۆنفڕانسەکەدا.