بەرپرسی فەرمانگەی پەیوەندیەکانی دەرەوە سەردانی نوێنەرایەتی حکومەتی هەرێمی کوردستان لە بەریتانیا دەکات

لەندەن-١٧/٩/٢٠٢١

سەفین دزەیی بەرپرسی فەرمانگەی پەیوەندیەکانی دەرەوەی حکومەتی هەرێم بە یاوەری فەلاح مستەفا بەرپرسی پێشووی فەرمانگە و ڕاوێژکاری باڵای سەرۆکی هەرێمی کوردستان بۆ کاروباری نێودەوڵەتی سەردانی نوێنەرایەتی حکومەتی هەرێمی کوردستانیان لە بەریتانیا کرد و لە لایەن نوێنەری حکومەت و کارمەندانی نوێنەرایەتیەوە بە گەرمی پێشوازیان لێکرا.

لە دیدارێکدا کاروان جمال تاهیر نوێنەری حکومەتی هەرێمی کوردستان لە بەریتانیا خۆشحاڵی خۆی بەو سەردانە دەربڕی و تیشکی خستە سەر گرینگی سەردانە فەرمیەکەی بەڕێز نێچیرڤان بارزانی سەرۆکی هەرێمی کوردستان بۆ بەریتانیا و دیداری لەگەڵ سەرۆك وەزیران و کاربەدەستانی ئەو ووڵاتە. جەختیشی لەسەر ئەوە کردەوە کەوا نوێنەرایەتی حکومەتی هەرێمی کوردستان لە بەریتانیا لە کار و هەوڵەکانی بەردەوام دەبێت بەمەبەستی بەهێزترکردنی پەیوەندیە دووقۆڵیەکانی نێوان هەرێمی کوردستان و بەریتانیا و خزمەتکردنی کۆمەڵگای کوردستانی لە بەریتانیا.

سەفین دزەیی بەرپرسی فەرمانگەی پەیوەندیەکانی دەرەوە خۆشحاڵی خۆی بە سەردانی نوێنەرایەتی حکومەتی هەرێم لە بەریتاینا دەربڕی و دەستخۆشی لە ستافی نوێنەرایەتی کرد بۆ بەردەوامی هەوڵەکان و کار و چالاکیەکانیان بەمەبەستی گەشەدان بە پەیوەندەیکانی نێوان هەرێمی کوردستان و بەریتانیا و خزمەتکردنی ڕەوەندی کوردستانی لەو ووڵاتە، هاوکات دەستخۆشی لە نوێنەرایەتی کرد بۆ ڕۆڵی بەرچاویان لە ڕێکخستن و سەرخستنی سەردانەکەی بەڕێز سەرۆکی هەرێمی کوردستان.

هەر لە دیدارەکەدا گفتوگۆ دەربارەی ژمارەیەك بابەتی پەیوەندیدار بە ئیش و کارەکانی نوێنەرایەتی کرا و جەخت لەسەر هەماهەنگی کرایەوە لە نێوان فەرمانگەی پەیوەندیەکانی دەرەوە و نوێنەرایەتی حکومەتی هەرێمی کوردستان، هەروەها چۆنیەتی زیاتر گەیاندنی خزمەتگوزاری بە ڕەوەندی کوردستانی.