بەبۆنەی هاتنی جەژنی نەورۆز ئاڵای کوردستان لە بەردەم باڵەخانەی شارەوانی پۆرتسمەس هەڵدەکرێت
بە ئامادەبوونی کاروان جمال تاهیر نوێنەری حکومەتی هەرێمی کوردستان لە بەریتانیا و شارەداری پۆرتسمەس لۆرد لی ماسۆن و پەرلەمانتار ستیڤن مۆرگان و کاربەدەستانی شاره‌که و ڕەوەندی کوردستانی بە فەرمی ئاڵای کوردستان لە تەك ئاڵای بەریتانیا لە بەردەم باڵەخانەی ئەنجومەنی شارەوانی پۆرتسمەس بەرزکرایەوە له بۆنه‌یه‌کدا به هه‌ماهه‌نگی ڕێکخراوی ماڵی کورد لە پۆرتسمەس و بە میوانداری به‌ڕێز شاره‌داری پۆرتسمس به‌ڕێوه‌چوو.
لەو بۆنەیەدا سەرەتا شارەداری شارەکە بەخێرهاتنی ئامادەبوانی کرد و جەژنی نەورۆزی لە هەموو لایەك پیرۆز کرد و خۆشحاڵی خۆی و کاربەدەستانی شارەوانی و خەڵکی پۆرتسمەسی بە بەرزکردنەوەی ئاڵای کوردستان دووپات کردەوە، وە ستایشی ڕۆڵی کوردانی دانیشتووی ئەو شارەی کرد و جەختی لەسەر بەردەوامیدان بە هەماهەنگی نێوان شارەوانی و ڕەوەندی کوردستانی کردەوە. شارەداری پۆرتسمەس هاوکات ستایشی ڕۆڵی ڕێکخراوی ماڵی کوردی کرد لە شارەکە کە تاقە ڕێکخراوی کوردیە لەو شارە کە ڕەوەندی کوردستانی لە ژێر چەتری خۆی کۆکردۆتەوە و خزمەتیان دەکات.
دواتر کاروان جمال تاهیر نوێنەری حکومەتی هەرێمی کوردستان لە بەریتانیا وێڕای ده‌ربڕینی خۆشحاڵی بە بەشداریکردن لەو بۆنەیە، ڕایگه‌یاند که “ئه‌مڕۆ ته‌نها ئاهه‌نگی نه‌ورۆز ناگێڕین به‌ڵکو ئاڵای کوردستانیش به‌رزده‌کرێته‌وه”، هاوکات به‌ناوی حکومه‌تی هه‌رێمی کوردستانه‌وه پیرۆزبایی جه‌ژنی نه‌ورۆزی له ئاماده‌بوان و گه‌لی کوردستان کرد، وه دەستخۆشی له ڕێکخراوی ماڵی کوردی پۆرتسمه‌س کرد که بە یەكڕیزی و یەکدەنگی خزمه‌تی ڕه‌وه‌ندی کوردستانی و پرسی کورد ده‌که‌ن و به چالاکییه‌کانیان توانیویانه دۆستایه‌تییه‌کی باش له‌گه‌ڵ ده‌زگاکانی شاره‌که دروست بکه‌ن، هه‌روه‌ها سوپاسگوزاری نوێنه‌رایه‌تی حکومه‌تی هه‌رێمی گه‌یانده شاره‌دار و هاووڵاتیانی شاره‌که بۆ به‌شداریکردن له ئاهه‌نگی نه‌ورۆز و ڕیزلێنانی ئاڵای کوردستان.
ڕێکخراوی ماڵی کوردیش لە ووتەیەکیاندا بەخێرهاتنی ئامادەبوانیان کرد و سوپاسی شارەدار و ئەنجومەنی شارەوانی پۆرتسمەسیان کرد بۆ ڕەزامەندیان لەسەر هەڵکردنی ئاڵای کوردستان بە شێویەکی فەرمی لەبەردەم باڵەخانەی شارەوانی، وە جەختیان لەسەر بەردەوامیددان بە کار و خزمەتگوزاریەکانیان کردەوە بۆ ڕەوەندی کوردی ئەو شارە.
لە کۆتایی بۆنەکەشدا ئامادەبوان بە شایی و هەڵپەڕکێ خۆشی و شادی خۆیان دەربڕی هه‌ر وه‌ک نه‌رێتێکی که‌لتووری نەورۆز و هەڵکردنی ئاڵای کوردستان کە بۆیەکەمین جارە لە ووڵاتی بەریتانیا ئەو جۆرە کارە دەکرێت.
هەر لە میانەی بەشداریکردنی شاندی نوێنەرایەتی لەو بۆنەیەدا کۆبوونەوەیەکیان لەگەڵ دەستەی بەڕێوەبردنی ڕێکخراوەکە ئەنجامدا. لە کۆبوونەوەکەدا باس لە کار و چالاکیەکان و ئەو کێشانە کرد کە دێنە بەردەم کاری ڕێکخراوەکە، هاوکات جەخت لەسەر بەردەوامبوون و بەرەوپێشبردنی هەماهەنگی نێوان نوێنەرایەتی حکومەتی هەرێم و ڕێکخراوی ناوبراو کرایەوە.
دواتر نوێنەری حکومەتی هەرێم لەگەڵ دەستەی بەڕێوەبردنی ڕێکخراوەکە سەردانی باخچه‌ی هه‌ڵه‌بجه‌یان کرد که له ئامێزی باخچەی هیوای شاری پۆرتسمسه و تاجە گوڵینەی وه‌فای لەسەر مۆنۆمێنتی هه‌ڵه‌بجه دانا کە بۆ یادکردنەوەی قوربانیانی هەڵەبجەی شەهید دروستکراوه. له‌سه‌ردانه‌که‌دا خەسرۆ ئاژگەیی بەڕێوەبەری کاروباری سیاسی و میدیا لە نوێنەرایەتی یاوەری نوێنەری حکومەتی هەرێم بوو
