نوێنەری حکومەتی هەرێم لە بەریتانیا دیدارێك لەگەڵ وەین دەیڤد وەزیری کاروباری ڕۆژهەڵاتی ناوەڕاست و باکوری ئەفریقیا لە حکومەتی سێبەر ساز دەکات

وەك بەشێك لە هەوڵە دیبلۆماسیەکانی نوێنەرایەتی حکومەتی هەرێم لە بەریتانیا لە بەردەوامیبوون لە پەیوەندیدا لەگەڵ دام و دەزگا فەرمیەکانی ئەو ووڵاتە، کاروان جمال تاهیر نوێنەری حکومەتی هەرێمی کوردستان لە بەریتانیا لە ڕێگای ڤیدیۆ کۆنفڕانسەوە دیدارێكی لەگەڵ وەین دەیڤد وەزیری کاروباری ڕۆژهەڵاتی ناوەڕاست و باکوری ئەفریقیا لە حکومەتی سێبەر سازکرد.

نوێنەری حکومەتی هەرێم وێڕای پیرۆزبایی له‌ وه‌ین ده‌یڤد، کورتەیەکی دەربارەی کوردستان و ئه‌رک و کاره‌کانی نوێنەرایەتی حکومه‌تی هه‌رێم له‌ به‌ریتانیا پێشکەشکرد. لە لایەکی ترەوە جەختی لەسەر ئەوە کردەوە کەوا ڕۆژهەڵاتی ناوەڕاست تەنها لە نەتەوەی عەرەب پێك نەهاتووە، بەڵکو زیاتر لە چل ملیۆن کوردیش وه‌ک نه‌ته‌وه‌ لە ڕۆژه‌ڵاتی ناوه‌ڕاسدان، کەوا پێویست ده‌کات تێگه‌یشتن و دایه‌‌لۆگی به‌رده‌وام هه‌بێت بۆ به‌دیهێنانی مافه‌کانیان و پێکه‌وه‌ ژیانی ئاشتیانه‌.

هەر لە درێژەی دیدارەکەدا کاروان جمال تاهیر باسی گرینگرتین ئەو کێشانەی کرد کە ڕووبەڕووی هەرێمی کوردستان بوونەتەوە، لەوانەش، گرینگی هەمەلایەن کردنی ئابوری هەرێم، یەکلاییکردنەوەی کێشەکانی نێوان هەولێر و بەغدا ئەویش بە گەیشتن بە ڕێکەوتنێك لە نێوان هەردوولادا بە پشت بەستن بە دەستووری هەمیشەیی عیراق، هاوکات بەهێزترکردنی پەیوەندیە دووقۆڵیەکانی نێوان هەرێمی کوردستان و بەریتانیا.

وه‌ین ده‌یڤد، له‌چوارچێوه‌ی پۆسته‌ نوێیه‌که‌یدا خواستی گوێبیستیی هه‌موو لایه‌ن و کاره‌کته‌ره‌کانی ڕۆژهه‌ڵاتی ناوه‌ڕاسته‌ و هه‌رله‌و سۆنگه‌یه‌وه‌ سوپاسی نوێنه‌ری حکومه‌تی هه‌رێمی کوردستانی کرد بۆ ئاگادارکردنه‌وه‌ی له‌ ڕووداوو دۆخی هه‌رێمی کوردستان.

له‌ کۆبونه‌وه‌که‌دا که‌ گاری کێنت سکرتێری گرووپی پشتیوانی لە هەرێمی کوردستان لە پەرلەمانی بەریتانیا ئاماده‌بوو، ڕۆشنایی خستە سەر دەستکەوتەکانی گرووپەکە بەمەبەستی هاریکاریکاردنی کوردستان، لە نێویشیاندا ڕازیکردنی پەرلەمانی بەریتانیا بۆ ناساندنی تاوانه‌کانی ده‌رهه‌ق به‌ گه‌لی کوردستان وه‌ک تاوانی جینۆساید.  هه‌روه‌ها هاندان و ڕازیکردنی پڕۆگرامی تەلەفزیۆنی ناوداری بەریتانیا  (Top Gear) بۆ ئەنجامدانی پڕۆگرامێك لە کوردستان. گاری کێنت هیواشی خواست کەوا وەین دەیڤد لە داهاتوودا لەگەڵ شاندی گرووپەکەی پەرلەمان سەردانی هەرێمی کوردستان بکات.