بۆ یەکەم جار پێشەنگایەکی هونەری کوردستانی لە لەندەن بەڕێوەچوو

وەك و بەشێك لە دیپلۆماسییه‌تی کەلتوری نوێنەرایەتی حکومەتی هەرێمی کوردستان لە بەریتانیا وه‌ بە هەماهەنگی لەگەڵ دامەزراوەی دی کۆنتێمپرەری  و گەلەری زاموا بۆ یەکم جار پێشەنگایەکی هونەری لە لەندەن ڕێکخست بۆ ژماره‌یه‌ک له‌ هونه‌رمه‌ندای هه‌رێمی کوردستان، که‌ پێنج هونەرمەندی شێوەکاری کورد کارەکانی خۆیان تێدا نمایشکرد ، کاره‌کان پێکهاتبوون لە ستایل و شێوەی جیاواز  کە ڕەنگدانەوەی تێکۆشان و مانەوە و گۆڕانکاری و بەردەوامی هەروەها نایەکسانی هەمەجۆری لە خۆ گرتبوو.

هونەرمەندەکان پێکهاتبوون لە به‌ڕێزان دڵشاد بەهائەدین و ئاودێر عثمان و کۆسار جەلال و نامیق حەمە فەرەج و ئەرسەلان ئەحمەد.

پیتەر ئۆکەین ، سەرۆکی دامەزراوەی دی کۆنتێمپرەری لە دەستپێکی قسەکانی ووتی “ئێمە خۆشحاڵین بەوەی کە دەرفەتمان هەبوو بە هەماهەنگی لەگەڵ نوێنەرایەتی حکومەتی هەرێمی کوردستان لە بەریتانیا چەند کارێکی ناوازەی شێوەکارانی کوردستان کە ڕەنگدانەوەی کۆڵنەدان و  دانبەخۆداگرتن و داهێنان پێشکەش بە ئێوەی بەڕێز بکەین، وە ئەو پەیوەندیە درێژوو و  تۆکمەیە لەگەڵ حکومەتی هەرێمی کوردستان بەرز ده‌نرخێنین”

لەلایەن خۆشیەوە نوێنەری حکومەتی هەرێمی کوردستان لە بەریتانیا، کاروان جەمال تاهیر ووتی ” ئه‌نجامدانی ئەم پێشانگایە هاوکاته‌ لەگەڵ چەند بۆنەیەکی گرینگ لە مێژووی کوردستان کە ئەوانیش بریتین لە، هەڵەبجە، نەورۆز و ڕاپەرینە مەزنەکەی خەڵکی کوردستان ٢٩ ساڵ بەر لە ئێستا و پاککردنەوەی خاکی کوردستان لە زەبرو زەنگی ڕژێمی دکتاتۆری سەدام حسێن، ڕاپەڕین وەڵامێك بوو بەرامبەر بە ساڵانێکی زۆر لە سه‌رکوتکردن و نکۆڵی کردن لە مافی کورد و تووندی تیژی ڕژێمی دکتاتۆری به‌عس به‌رامبه‌ر گه‌لی گه‌لی کوردستان، هاوکات بۆ بەدەستهێنانی ئازادی و دیموکراسی”. لە درێژەی قسەکانی بەڕێز نوێنەری حکومەت ووتی ” دەستپێکی ئەو  پڕۆژەیەمان دەگەڕێتوە بۆ گرینگی دان بە دیبلۆماسییه‌تی کەلتوری لە نوێنەرایەتیەکەمان لە بەریتانیا کە ئەمەش هەلی ئەوەمان پێدەدات پەرە بە کەلتوری کوردی بدەین، هاوکات  له‌رێگه‌ی ئه‌و جۆره‌ پێشانگایانه‌وه‌ بەهاکانی که‌ گه‌لی کوردستان باوه‌ڕی پێیان هه‌یه‌ بخه‌ینه‌ ڕوو له‌وانه‌ به‌های ئاشتی و  پێکەوە ژیان و لێبوردەیی و یه‌کسانی ژنان و دیمۆکراسی. ئامانجی ئێمە دروستکردنی پلاتفۆرمێکە بۆ هونەرمەندانی کورد بۆ ئەوەی له‌ نمایشی لۆکاڵی ده‌ربچن و بتوانن لەسەر ئاستێکی نێودەوڵەتی و لە ڕێگای هونەرە هاوتاکانیان تواناکانی خۆیان پیشانی کۆمه‌ڵگه‌ی به‌ریتانیا بدەن بۆ ئەوەی لە ڕێیەوە خەڵک ئاشنا بێت بە هونەری کوردی سەرەڕای بەربەستی زمان و کەلتوور، کە هەموو کات دەگوترێ هونەر خۆی هەزار ووشە قسە دەکات.”

دڵشاد بەهائەدین، بەڕێوەبەری گەلەری زاموا سوپاسی نوێنەرایەتی حکومەتی هەرێمی کوردستانی لە بەریتانیا و دی کۆنتێمپرەری کرد بۆ ڕێکخستنی پێشەنگاکە، وە لە درێژەی قسەکانی ووتی “ئەم پلاتفۆرمانە هەل بە ئێمەی هونەرمەند دەدات کارەکانمان پێش بخەین بۆ ئەوه‌ی لەسەر ئاستی نێوەدەوڵەتی بناسرێت. کارەکانم تیشك دەخاتە سەر  مێژووی چەوسانەوەی ئافرەت و  هەوڵدان بۆ یەکسانی لە ڕۆژهەڵاتی ناوەڕاست.”

ژمارەیەکی بەرچاو لە هونەرمەندان و هەنەر دۆستان و  سیاسیەتمەدار و  دیپلۆماتکار و ڕوەندی کوردی ئامادەی  پێشەنگاکە بوون، لە ناویشیاندا بەڕێز مایکل فاڵن وەزیری بەرگری پێشوو لە حکومەتی بەریتانیا.

جێگه‌ی ئاماژه‌یه‌ که‌ پێشانگاکه‌ تاکو ڕۆژی ١٨ ی مارس له‌ کاتژمێر ١٠ به‌یانی بۆ ٥ ی ئێواره‌ له‌ ڕۆژانی هه‌فته‌ جگه‌ له‌ یه‌کشه‌مه‌ به‌رده‌وام ده‌بێت.