نوێنەری حکومەتی هەرێمی کوردستان بەشداری لە مەراسیمی کردنەوەی یەکەمین پێشانگای لینکنشێر دەکات

شانشینی یەکگرتوو، لینکنشێر، www.uk.gov.krd. بە بەشداری زیاتر لە ١٠٠٠ کۆمپانیا و پیاوی کار و دیبلۆماتکار و میوانی بیانی، وە بە بەنگهێشتنامەیەکی فەرمی، کاروان جمال تاهیر نوێنەری حکومەتی هەرێمی کوردستان لە بەریتانیا بەشداری دەکات لە مەراسیمی کردنەوەی یەکەمین پێشانگای  لینکەشێر.

ئامانجی پێشانگاکە نمایشکردنی داهێنانە نوێیه‌کان، هەلەکانی کار و وەبەرهێنان بوو لە ناوچەکە و لە سەرتاسەری بەریتانیا کە لەلایەن خاتوو ئەندریا جێنکینس گه‌وره‌ شارەداری لینکنشێر سازکرابوو. لە پەراوێزی پێشانگاکەدا کۆمپانیاکانی ناوچەی لینکنشێر بەروبووم و بەرهەمەکانی خۆیان نمایش کرد، لە نێویشیاندا تەکنەلۆجیای کشتوکاڵ، تەکنەلۆژیای سەربازی و بەرهەمەکانی خۆراك کە ئاماژەیان بە گەشەسەندنی بوارەکانی پێشکەوتنی تەکنەلۆژیا و پیشەسازی لە وڵاتی بەریتانیا دەکرد.

لە ووتەیەکیدا، خاتوو ئەندریا جێنکینس شارەداری لینکنشێر ئاماژەی بەوەدا کەوا پێشانگاکە تیشک ده‌خاته‌ سەر پێشکەوتنه‌کانی بواری پیشەسازی و ئه‌ندازیاری و وزه‌و ئاستی ئه‌کادیمی و به‌رهه‌مه‌كانی خۆماڵی پارێزگاکه‌یان و خواستی سەرنجراکێشانی وەبەرهێنەران بۆ ناوچەی لینکنشێر و بەهێزکردنی پەیوەندیەکانی ناوچەکەیە لەگەڵ جیهانی دەرەوە.

هەر لە مەراسیمەکەدا، کاروان جمال تاهیر نوێنەری حکومەتی هەرێمی کوردستان لە بەریتانیا تیشکی خستە سەر گرینگی گەشەدان بە پەیوەندیەکانی نێوان لینکنشێر و هەرێمی کوردستان، بە تایبەتیش لە بوارەکانی تەکنەلۆژیای کشتوکاڵی و پیشەسازی، ئاماژەشی به‌ ستراتیج و هەنگاوەکانی حکومه‌تی هەرێمی کوردستان تایبه‌ت به‌ هەمەچەشنکردنی ئابوری هەرێم دا، له‌و ڕووه‌وه‌ وتیی "هەرێمی کوردستان چالاکانە کار دەکات بۆ هەمەچەشنکردنی ئابوری خۆی و پێویستی بە هاوبه‌شی و شارەزاییە پێشکەوتووە نێودەوڵەتیەکان لە سێکتەرەکانی که‌ ئه‌وله‌وییه‌تی حکومه‌تی هه‌رێمن هه‌یه‌." هه‌ر له‌ وته‌که‌یدا جەختی لەسەر ئەوە کردەوە کەوا پەیوەندیە دووقۆڵیەکان بە قازانجی دوولایەنە و هاوبەشیەتی راستەقینە دەبینن لەگەڵ ناوچەی لینکنشێر.

هاوکات داوای لە کۆمپانیا و وەبەرهێنەرەکان کرد خواستەکانیان بۆ وەبەرهێنان لە هەرێم بخەنە سەر ئەرزی واقیع و سوود لە هەلەکانی وەبەرهێنان لە هەرێمی کوردستان وەربگرن.

شایانی باسە، پێشانگا لینکنشێر هەنگاوێکی گرینگە بۆ ناساندنی ووڵاتی بەریتانیا وەك سەنتەرێکی گرینگ بۆ بازرگانی و وەبەرهێنانی نێودەوڵەتی، وە بەشداریکردنی سەرکردەکانی ناوچەکە، دیبلۆماتکاران و کۆمپانیا و وەبەرهێنەران ئاماژە بە گەشەسەندنی خواستە جیهانیەکان دەکات لەسەر سەرچاوە پیشەسازییەکانی ئەو ناوچەیە.

لینکنشێر، بەریتانیا
٢٢ی ئۆکتۆبەری ٢٠٢٥