نوێنەری حکومەتی هەرێمی کوردستان پێشوازی لە لۆرد ئودنی-لیستەر ده‌کات.

شانشینی یەکگرتوو، نووسینگەی نوێنەرایەتی، www.uk.gov.krd.  کاروان جمال تاهیر نوێنەری حکومەتی هەرێمی کوردستان له‌ باڵه‌خانه‌ی نوێنه‌رایه‌تی هه‌رێمی کوردستان له‌ له‌نده‌ن پێشوازی لە لۆرد ئودنی-لیستەر کرد .

لە دیدارەکەدا، گفتوگۆ دەربارەی دوایین پێشهات و پەرەسەندنەکان و دۆخی سیاسی و ئاسایش و ئابوری عێراق و هەرێمی کوردستان و ناوچەکە کرا که‌ جێگه‌ی بایه‌خی هه‌ردوولان، هه‌روه‌ها تیشک خرایه‌ سه‌ر پەیوەندی دوولایه‌نه‌ی نێوان هەرێمی کوردستان و شانشینی یه‌کگرتوو، وه‌ له‌و باره‌یه‌وه‌ لۆرد لیسته‌ر ڕایگه‌یاند که‌ خۆی به‌ دۆستی نزیکی گه‌لی کوردستان و هه‌رێمی کوردستان ده‌زانێت و به‌رده‌وام ده‌بێت له‌ پشتیوانی و هاوکاریکردنی هه‌رێمی کوردستان.

نوێنەری حکومەتی هەرێمی کوردستان وێڕای دەربڕی سوپاسگوزاری خۆی بە سەردانەکەی لۆرد لیستەر، هاوکات ڕایگه‌یاند که‌ به‌رژه‌وه‌ندی و به‌ها هاوبه‌شه‌کانمان په‌یوه‌ندییه‌کانی نێوان هه‌ردوولای تۆکمه‌تر کردووه‌ و جەختی کردەوە لەسەر بەردەوامیدان بە بره‌ودانی زیاتر پێیان.

لەلایەن خۆشیەوە، لۆرد لیستەر سوپاسی نوێنەری حکومەتی کرد بۆ ئەو پێشوازیەگەرمە و بە گرینگیەوە باسی لە دۆستایەتی بەردەوام لەگەڵ هەرێمی کوردستان و پەرەپێدانی پەیوەندیەکان کرد.

له‌نده‌ن
١٨ ئه‌یلوولی ٢٠٢٥