ڕێنمایی تایبەت بە نوێکردنەوەی مۆڵەت
ئاگادارییه‌کانمان : 7/1/2022
ڕێنمایی بۆ ئه‌وهاووڵاتیه
به‌ڕێزانه‌ی که له به‌ریتانیان و فه‌رمانبه‌ری حکومه‌تی هه‌رێمن و له مۆڵه‌تدان
و ده‌یانه‌وێت مۆڵه‌ته‌که‌یان درێژبکه‌نه‌وه.
بە پێی ڕێنماییەکانی حکومەتی هەرێمی کوردستان داواکار بۆ نوێکردنه‌وه‌ێ مۆڵه‌ت پێویسته:
له ڕێگه‌ی نوێنه‌رایه‌تی حکومه‌تی هه‌رێمی کوردستان داواکاری به نوسراو پێشکه‌ش بکات و داوای
درێژکردنه‌وه‌ی مۆڵه‌ت بکات، له داواکارییه‌که‌دا ئاماژه به ناوی سیانی و
ناونیشانی وه‌زیفی و شوێنی کار بکه‌ن، هه‌روه‌‌ها به‌رواری وه‌رگرتنی مۆڵه‌ت و به‌رواری کۆتایی مۆڵه‌تی ئێستا، هاوکات ئاماژه
به هۆکاری نه‌گه‌ڕانه‌وه‌ی بۆ کوردستان بدات و پاشان ئاماژه به ماوه‌ی
درێژکردنه‌وه‌ی مۆڵه‌ته‌که‌تان بکه‌ن. ده‌بێت داواکارییه‌کان واژووی خۆتان و
ناونیشان و ژماره ته‌له‌فۆنی له‌سه‌ربێت.
بۆ هه‌ر هۆکارێک که
بۆته هۆی ئه‌وه‌ی نه‌توانن بگه‌ڕێنه‌وه سه‌ر کاره‌که‌تان پێویسته به به‌ڵگه
پشتراستی بکه‌نه‌وه و وینه‌یه‌کی له‌گه‌ڵ داواکاری هاوپێچ بکه‌ن.
ئه‌و فه‌رمانبه‌رانه‌ی
که به‌هۆکاری ته‌ندروستی ناتوانن بگه‌ڕێنه‌وه سه‌ر کار، پێویسته ڕاپۆرتی پزیشکی
سه‌لمێنراو له وه‌زاره‌تی ده‌ره‌وه‌ی به‌ریتانیا هاوپێچ بکه‌ن و وه‌رگێڕدرابێته
سه‌ر زمانی کوردی له نوسینگه‌یه‌کی باوه‌ڕپێکراوی وه‌رگێڕان له به‌ریتانیا.
داواکار ده‌توانێت به
بۆست یان به ده‌ستی داواکاری و به‌ڵگه‌کانی بنێرێت بۆ نوێنه‌رایه‌تی حکومه‌تی هه‌رێم
له له‌نده‌ن.
پاش گه‌شتنی داواکاری، نوێنه‌رایه‌تی
حکومه‌تی هه‌رێم به نوسراوی فه‌رمی داواکارییه‌که ئاراسته‌ی فه‌رمانگه‌ی په‌یوه‌ندییه‌كانی
ده‌ره‌وه ده‌کات و له‌وێشه‌وه ئاراسته‌ی وه‌زاره‌تی په‌یوه‌ندیدار ده‌کرێت بۆ
بڕیاردان له‌سه‌ر داواکارییه‌که.
نوێنه‌رایه‌تی حکومه‌تی
هه‌رێم ناتوانێت هیچ داواکارییه‌ک جێبه‌جێ بکات ئه‌گه‌ر دروست نه‌بێت و هه‌ڵه
یاخود که‌موکورتی هه‌بێت له به‌ڵگه‌کاندا.
بۆ سه‌لماندن )تەسدیقکردنی( بەڵگەنامەکانتان لە وەزارەتی دەرەوەی بەریتانیا، تکایە سەردانی
ئەو گرتەیەی خواره‌وه بکەن:
https://www.gov.uk/get-document-legalised
بۆ ناردنی داواکاری و هاوپێچه‌کانی
به پۆست، تکایه ئاراسته‌ی ئه‌م ناونیشانه‌ی خواره‌وه‌ی بکه‌ن:
KRG Office
2 Hobart Place
Balgavia
SW1W 0HU
تێبینی زۆر گرینگ
ئه‌و داواکاری و دۆکۆمێنتانه‌ی به سکرین شۆت و شێوازی تری
نه‌گونجاو ڕه‌وانه‌ی نوێنه‌رایه‌تی حکومه‌ت ده‌کرێت کاری پێناکرێت و داواکارییه‌که
پرۆسێش ناکرێت، بۆیه زۆر گرینگه دۆکۆمێنته‌کانتان به‌دروستی پێشکه‌ش بکه‌ن.
ئه‌وداواکاریانه‌ی که‌موکورتی هه‌بێت و دۆکۆمێنته‌کان ڕاستاندنی بۆ نه‌کرابێت و به‌پێی
ڕێنماییه‌کانی سه‌ره‌وه نه‌بن، به هه‌مانشێوه پرۆسێس ناکرێن.
بۆ زانیاری زیاتر تکایه
په‌یوه‌ندی بکه‌ن به نوێنه‌رایه‌تی حکومه‌تی هه‌رێم له له‌نده‌ن له ڕێگه‌ی :
Phone number: 02039279870
E-mail: uk@gov.krd
لەندەن
٤ ته‌مووز ٢٠٢٢