KRG Representation in the United Kingdom
LONDON



  بەڕێز کاروان جەمال تاهير

کاروان جەمال تاهير
نوێنەری حکومەتی هەرێمی کوردستان
لە بەریتانیا

کاروان جەمال تاهیر لە ڕۆژی ١١ کانوونی دووەمی ١٩٧١ لە شاری سلێمانی لەدایکبووە، خێزاندارە و دوو منداڵی هەیە.

کاروان جەمال لەسەر ڕێچکەی تێکۆشانی باوکی بەردەوام بوو بە هاتنە ناو دنیای سیاسەت، وە لە ساڵی ١٩٩١ پەیوەندی بە ڕیزەکانی یەکێتی نیشتمانی کوردستانه‌وه‌ کردووە، وە بووە بە ئەندامی سکرتاریەتی سکرتێری گشتی ی.ن.ک و تاکو ساڵی ١٩٩٨  له‌ چەندین ئۆرگانی یەکێتی نیشتمانی کوردستان کاری کردووە. ساڵی ١٩٩٩ هاتووە بۆ بەریتانیا بۆ تەواوکردنی خوێندنی زانکۆ و لە ساڵی ٢٠٠٣ بڕوانامەی بەکالۆریۆسی بە دەستهێناوە لە بواری زانستی کۆمپیوتەر و کارگێڕی، لە زانکۆی مانچستەر بۆ زانست و تەکنۆلۆژیا (UMIST).

کاروان جەمال لەساڵی ٢٠٠٤ بۆ ٢٠٠٧ وەك ڕاوێژکار کاریکردووە بۆ ده‌زگای گشتی پڕۆژە تایبەتەکان، پاشان له‌ وه‌زاره‌تی سامانه‌ سروشتیه‌کان به‌رده‌وامی داوه‌ به‌ کاره‌کانی به‌ پله‌ی ڕاوێژکار و له‌ ماوه‌ی کارکردنیدا ڕۆڵیکی گرنگی هەبووە لە داڕشتنی پلان و ستراتیژ و به‌ڕێوه‌بردنی کار له‌ که‌رتی نه‌وت و گاز له‌ هه‌رێمی کوردستان، هاوکات له‌ گه‌شه‌پێدانی پەیوەندیەکانی وەزارەتی سامانە سروشتیەکان لەگەڵ کۆمپانیا نەوتیە جیهانیەکان. له‌ و ماوه‌یه‌دا سەرۆکی سێ لیژنەی هه‌ماهه‌نگی بووه‌، جگە لە ئەندامێتی چەند لیژنەیەکی تر تاکو ساڵی ٢٠٠٩.

کاروان جەمال تاهیر لە ساڵی ٢٠٠٩ جێگری به‌رپرسی فەرمانگەی پەیوەندیەکانی دەرەوە بووه‌ به‌ پله‌ی بریکاری وه‌زاره‌ت، له‌ ماوەی دەستبەکاربوونی لە فەرمانگەی پەیوەندیەکانی دەرەوە برەوی بە پەیوەندیەکانی حکومەتی هەرێمی کوردستان داوە له‌ بواری دیبلۆماسی و سیاسی و کەلتووری لەگەڵ کۆمەڵگای نێودەوڵەتی له‌ ڕێگه‌ی بەشداری لە چەندین کۆنفرانس و کۆڕبه‌ندو بۆنه‌ی نێوده‌وڵه‌تی، هه‌روه‌ها کارکردنی  به‌رده‌وامی لەگەڵ کۆمەڵگای دیبلۆماسی لە هه‌رێمی کوردستان.

لە مانگی حوزەیرانی ٢٠١٥ ده‌ستنیشان کراوه‌ وه‌ک نوێنەری حکومەتی هەرێمی کوردستان لە بەریتانیا وه‌ هەوڵه‌کانی بۆ زیاتر بەهێزکردنی پەیوەندی دوو قۆڵی نێوان حکومەتی هەرێمی کوردستان و حکومەتی بەریتانیا ده‌بێت له‌ گشت بواره‌کانی سیاسی و که‌لتووری و ئابووری،وه‌ دروستکردنی په‌یوه‌ندی زیاتر له‌گه‌ڵ دامەزراوە هزریەکان و ڕێکخراوە ناحکومیەکان و دامەزراوە پەروەردەییەکان و ڕێکخراوە کەلتووری و بازرگانیەکان، هه‌روه‌‌ها بونیاتنانی په‌یوه‌ندیه‌کی دۆستانه‌ له‌گه‌ڵ ڕه‌وه‌ندی کوردستانی بۆ پێشخستنی پرسه‌ نه‌ته‌وایه‌تی و هاوکات هه‌ماهه‌نگی و کارکردن پێکه‌وه‌ له‌ پێناو به‌رژه‌وه‌نیه‌ باڵاکانی هه‌رێمی کوردستان و هاوڵاتیان هه‌رێم له‌ به‌ریتانیا.
 

  
بەڕێز کاروان جەمال تاهير نوێنەري حکومەتي هەرێمي کوردستان لە بەريتانيا