English عربی کوردی
 
 
KRG UK REPRESENTATION
LONDON
KRG UK -
Thu, 11 Feb 2016 16:36:16

نادیە موڕاد کچە ئێزیدی ڕزگاربوو لە دەستی داعش ئامادەی دانیشتنێکی پەرلەمانی بەریتانیا دەبێت
           
 

لە میانەی دانیشتنێکی پەرلەمانی بەریتانیا کە لە ڕۆژی چوارشەممە بەڕێوەچوو و تایبەت بوو بە پرسیار و وەڵام لە سەرۆکی حکومەتی ئەو وڵاتە کە تیایدا کچە ئێزیدی ڕزگاربوو لە دەستی داعش ئامادەی ئەو دانیشتنە بوو، پەرلەمانتار ڕۆبەڕت جێنریك پرسیارێكی ئاڕاستەی دێڤید کامیرۆن کرد سەبارەت بە پرسی ئافرەتە ئێزیدیەکان کە لە سەر دەستی داعش بە دڕەندەترین شێوە مامەڵەیان لەگەڵ کراوە.

ناوبراو لە پرسیارەکەیدا ئاماژەی بەوەدا کە نادیە موڕادی کچە ئێزیدی زۆربەی کەس و کاری بە دەستی داعش کوژراون و خۆشی دووچاری ئەشکەنجە و دەستدرێژی سێکسی بۆتەوە و وەك کۆیڵە مامەڵەی لەگەڵ کراوە. پەرلەمانتاری ناوبراو داوای ڕوونکردنەوەی لە دێڤد کامیرۆن کرد سەبارەت بە  چۆنیەتی بەکارهێنانی دەسەڵاتی خۆی بۆ پشتگیریکردن لە کچ و ژنە ئێزیدیەکان و لەناوبردنی گرووپی تیرۆریستی داعش.

لە وەڵامدا دێڤد کامیرۆن سەرۆك وەزیرانی بەریتانیا بەخێرهاتنی نادیە موڕادی کرد بۆ دانیشتنەکەی پەرلەمان و ئاماژەی بەوەدا کە ئێزیدیەکان دووچاری نەهامەتیەکی زۆر هاتوونەتەوە لە عیراق و سوریا و بە دڕەندترین شێوە لە لایەن گرووپی تیرۆریستی داعشەوە هەڵس و کەوتیان لەگەڵ کراوە.

هەروەها ووتی: "دەبێت ئەوەی لە تواناماندایە بیکەین بۆ لەناوبردنی داعش و ئایدیۆلۆژیا توندڕەوەکەی. ئێمە ڕۆڵی سەرەکی دەبینین لە هاوپەیمانیەتی نێودەوڵەتی. لە عیراق کە ژمارەیەکی زۆری ئێزیدیەکان تووشی نەهامەتی هاتن لەسەر دەستی داعش، ئەو گرووپە زیاتر لە ٤٩% ی ئەو خاکانەی لەدەستداوە کە پێشووتر کۆنتڕۆڵی کردبوو.  بەردەوامیش دەبین لەو هەوڵانەمان تا کۆتایی هێنان بەو گرووپە شەڕانگێزە فاشیستە."

شایانی باسە ماوەی چەند ڕۆژێکە نادیە موڕاد کچە ئێزیدی ڕزگاربوو لە دەستی داعش لە بەریتانیایە و چەندین دیدار و کۆبوونەوەی لەگەڵ لایەنە پەیوەندیدارەکانی ئەو وڵاتە و دەزگا و ڕێکخراوەکان ئەنجامداوە بەمەبەستی وەدەستهێنانی پشتگیری زیاتری بەریتانیا بۆ کەیسی ئێزیدیەکان و ناساندنی وەك جینۆساید و هاریکاریکردن و یارمەتیدانی قوربانیانی ئێزیدی.